Tele-Post aningaasanik qaloorpoq

Tele-Postip 2012-imut ukiup affaanut siullermut naatsorsuutit akileraartinnani 58 million koruuninik sinneqartooruteqartut saqqummiuteqqammerpai.

58 million koruuninik silleqartoornermi tamanna 100 procentimik siuariarneruvoq 2011-mi piffissamut tassunga 29 millioningajannik sinneqartoorfiusumut naleqqiullugu.

Taamatut malunnarluartumik siuariarnermut ingammik marluk peqqutaapput: Angallattakkanik atuinerup annertuserujussuarnera, atuisummi angallattagartik atornerulersimavaat e-mailit takunarlugit internetimullu alakkarterinermut, aammali suliffeqarfimmi annertuumik pisariillisaasoqarsimavoq, tassani allaffissornikkut sipaarniarsimanerit taamatut sinneqartoorujussuarnermut peqqutaaqataallutik.

- Aningaasaqarnitta naammaginartumik ingerlanera nuannaarutigeqaarput, tassanilu minnerunngitsumik sulisorpassuatta sulilluarsimanerat peqqutaavoq. Suliffeqarfik suliffeqarfiussaaq sulleriffiuvoq pitsaasumillu ingerlanneqartoq, taamaanngikkuttami nunatsinni aningaasaliinerit annertuut ingerlatiinnarsinnaanngilagut. Aamma unammillersinnaanissaq aatsaat taama pingaaruteqartigaaq nunatsinni tamarmi atuisutsinnut iluaqutaasumik, Tele-Postimi pisortaanerugallartoq Steen Montgomery-Andersen oqarpoq.

- Sinneqartooruteqarluarnitsigut inuinnarnut atuisunut inuussutissarsiuteqartunullu akitigut appaanissamut inissaqalerpoq aningaasaliinerillu nunatsinnut iluaqutaasussat ingerlateqqillugit, erseqqissaavoq.

Læs om prisnedsættelserne og hvorfor det stadig ikke er muligt at sænke prisen på bredbånd til private kunderi "Tele-Post dumper priser"

Postimi aamma siuariartoqarpoq
Aamma allakkerinermut immikkoortortami ukiup affaani siullermi angusarissaartoqarpoq, tassanai kaaviiaartitat siornamut naleqqiullugit 4 procentimik annertuseriarsimallutik naak nunarsuarmi tamarmi qarasaasiakkut allanneq annertusiartuinnaraluartoq.

Ukiumi qaammatit siulliit arfinillit ingerleersut pisortat naatsorsuutigaat 2012-mi ukiumut naatsorsuutini akileraartinnani sinneqartoorutit 90 million koruunit missaanniissasut siorna 71 million koruuniniit qaffasinnerulaarsimariarlutik.

Steen Montgomery-Andersenilli erseqqissarpaa ukiumut naatsorsuutissatut ilimagineqartut mianersuuttariaqartut, namminersortunngorsaasoqartussaavormi aamma Telestyrelsenip akit appartinnissaannut piffissaliussat suli ilisimanngilai.

Se Tele-Posts halvårsrapport her