RAL 22,7 million koruuninik amigartoorpoq
Royal Arctic Line ukiup affaani siullermi akileraartinnani 22,7 million koruuninik amigartooruteqarpoq, siorna piffissami tassani 4,7 million koruuninik amigartoorsimalluni
2012-mi ukiup affaani siullermi naatsorsuutini kinguariarneq 2011-mut naleqqiullugu ingammik peqquteqarpoq kaaviiaartitsinerit annikillisimaneranni uuliaa allamiullu aningaasaannut tapit ilanngunneqartinnagit, aammali umiarsuarnut aningaasartuutit amerlisimallutik ingammik ikummatissamut aningaasartuutit annertuumik qaffannerisigut, Royal Arctic Linep ukiup affaanut naatsorsuutaani allassimavoq.
Akileraareernerup kingorna piginneqataaffiillu isiginiareerlugit suliffeqafik 14,4 million koruuninik amigartoorpoq. 2011-mi piffissami tassani amigartoorut annikinneroqaaq, tassaallu akileraartinnani 4,7 koruuninik, akileraareerlunilu 3,3 koruunit.
Assartukkat ikinnerusut
Taamatut aningaasaqarnikkut angusat peqquteqarput assartukkat annikillisimanerannik, 2012-mi ukiup affaani siullermi assartukkat 341.000 kubikmeterit nunatsinnut, nunaatsinniit kiisalu nunatta iluani assartorneqartut. Siorna piffissami tassani Royal Arctic Line 373.000 kubikmeterinik assartuisimasoq.
Ukiumi qaammatini arfinilinni siullermi nunatsinnut assartukkat 32.000 kubikmeterinik annikillisimapput, tassalu 2011-mi ukiup affaanut naleqqiullugit 16 procentimik annikilleriarlutik.
Nunatsinniit assartukkat aamma ikilsimapput, tamannalu annermik peqquteqarpoq raajartassat ikilisimanerannik. Siornamut naleqqiullugu 11.000 kubikmeterinik annikillisimapput.
Nunatta iluani assartuineq ukiup affaani siullermi 11.000 kubikmeterinik qaffariarsimavoq. Tassalu 2011-mi piffissamut tassunga naleqqiullugu 24 procentimik annertuseriarluni. Annertusineranut peqqutaavoq aalisakkerivinniit assartukkat aalajangersimasumik kissassuseqartussat amerlisimanerannik, Royal Arctic Linep ukiup affaanut naatsorsuutaani allassimavoq.
2012-mi sinneqartoornissaq naatsorsuutigaat
Ukioq tamaat eqqarsaatigalugu umiarsuaatileqatigiit naatsorsuutigaat assartukkat annikillinissaat. Naatsorsuinerit takutippaat 2011-mi assartukkat 834.000 kubikmeteriusut 30.000 kubikmeterinik annikillisimanerat naatsorsuutigineqarlunilu 2012-mi 800.000 kubikmeteriussasut.
Taamaakkaluartoq Royal Arctic Linep naatsorsuutigaa 2012-mi akileraartinnani 50-55 million koruuninik sinneqartoornissami tassalu missingersuutini 2011-mi ukiumut naatsorsuutit saqqummiunneqarneannut atatillugu saqqummiunneqartunit 35-40 million koruuniusunit annertunermik.