Sinerissami tusagassiuutit KNR-p ajornartorsiornera ernummatigaat

Sinerissami takusassiiviit tusagassiiviillu kattuffiata KNR-ip annertuumik aningaasaqarnikkut ajornartorsiornera ajuusaarutigaat. Naalakkersuisullu silatusaaqqullugit kajumissaarpaat

Sinerissami lokalradio aamma tv-qarfiit KNR-ip ajornartorsiornera ernumanartoqartippaat. Foto: Hans Jukku Noahsen

- Sinerissami lokalradio aamma tv-qarfiit KNR-ip sipaarniarneranik annertuumik eqqorneqartussanngorput, tamannalu paasissutissat kingulliit pissarsiarereenerisigut paasinarsivoq.

Taama nalunaarpoq Sinerissami Takusassiiviit Tusagassiiviillu Kattuffiat, STKK.

- Ukiuni ineriartorfiusuni pinngitsoorneqarsinnaanngilluinnarpoq tusagassiuteqarnikkut nukittuumik, ineriartorfiusumillu inissisimanissaq. Maannakkullu sinerissamiit aallakaatitassianik/ ilanngutassianik sumiiffinni tusagassiuteqarfiit suleqatigalugit pissarsisarneq oqaluttuaannanngupajaassaaq. Tamanna kalaallinut inuaqatigiinnut kinguariarneruvoq annertooq, Jens Klaus Lennert STKK-p siulersuisui sinnerlugit taama oqarpoq erseqqissarlugulu KNR-ip sipaarniarnera inuit tamat oqartussaaqataanerannik qularnanngilluinnartumik tamanna annertuumik eqquissasoq.

Læs også "KNR i ordkrig med Mimi"

Læs også "D klar med milliongave til KNR - drop ICC-tilskud"

- Lokalradio aamma tv-qarfiit aningaasaqarnermikkut annertuumik eqqorneqaatigissavaat, aammalu suleqatit pikkorissut annaaneqarnissaannik kinguneqarsinnaalluni, ajornerpaaffianilu sumiiffinni tusagassiuteqarfiit ilaasa matusariaqalernerannik kinguneqarsinnaalluni.

Naalakkersuisut silatusaaritsi
Jens Klaus Lennertip erseqqissarpaa KNR nunatsinnik tamarmik kiffartuussinissamik pisussaaffeqartoq.

- Tamatumalu malitsigisaanik pinngitsoorneqarsinnaanngilaq Nuup avataaniik radiukkut tv-kullu ilanngutassianik siammartiterinissaq. Taamaammat maannakkut pissutsit ornitagut ukiunik arlalinnik kinguariarnertut taasariaqarput.

- Tusagassiuteqarnikkut atugarisat minnerpaamik naammaginartumik inissisimanngippata, taava nuna ineriartorfiusoq aamma naammaginartumik ingerlasinnaanngilaq. Taamaammat ilungersorluta Naalakkersuisut qinnuigerusuppagut isumatusaarlutik piaarnerpaamik pissutsinik iluarsiiniaqqullugit, Jens Klaus Lennert kajumissaarivoq.

Powered by Labrador CMS