Kinamiut akisaatikitsut nunatsinnut suliartorsinnaassapput
Namminersorlutik oqartussat inatsisiliulersaarput nunatsinni aatsitassarsiorfinni nunanit allamiut akissaatikitsut suliartorsinnaanissaat anguniarlugu
Nunatsinni nutaamik inatsisissami periarfissaqalissaaq suliffeqarfiit aatsitassarsiortut allanillu suliniuteqartut nunanit allaneersunit tusindilikkaanik sulisoqarsinnaanissaminnut nunat allamiut atugaannik atugartinneqartunik. Assersuutigalugu London Mining Greenlandip Nuup kangerluani Isukasiani saviminermik piiaavissaani Kinamiunik tikisitsisoqarsinnaassaaq Kinamiutut akissaatilinnik.
Nunatsinni inatsisissaq piviusunngorsinnaassanngilaq qallunaat naalakkersuisui akuliutsinnagit, nunanimi allamiunut tunngasut Danmarkip akisussaaffigai.
Berlingske naapertorlugu Inatsisinik atortitsinermut ministereqarfik inatsisissamik siunnersuusiorpoq nunanut allanut tunngatillugu inatsisinut ilassutaasussamik, taamaalillutik nunani allamiut sanaartornerup nalaani suliartorniarunik akuerineqarsinnaallutik, soorlu aatsitassarsiorfiit ilaanni "naammaginartunik akissarsiaqarlutillu atorfininnerminni atugassaqarlutik". "Naammaginartoq" uani qanoq paasisariaqarnersoq akissutissarsineqanngilaq, aviisi allappoq.
DF aamma EL inatsisissamut akerliulluinnarput, S aamma SF oqaaseqaratik.