"Eskimuut unataanerat" politikerip alutorigaa
Venstremi politikerip oqariartaaseq "eskimuut unataanerat" Kalaallit Nunaanni ikiaroornartumik sakkortuumik nioqquteqarnissamik pinaveersimatitsisutut isumaqarfigisani alutoraa
Folketingip illersornissamut ataatsimiititaliaa sapaatip-akunnerani kingullermi nunatsinni paasisassarsiorluni angalavoq. Venstremeersoq Karsten Lauritzen angalaqataavoq, taassumalu Kalaallit Nunaanni Politiit aamma oqaloqatigai.
Lauritzen naapertorlugu politiit nassuiaasimapput Kalaallit Nunaanni sakkortuunik ikiaroornartoqannginneranut assersuutigalugu kokainimik ecstasymillu tuniniaaniaraluartut hashimik tuniniaasartunit Kalaallit Nunaanni hashimik nioqquteqarnermik iluanaaruteqarluartartunit ikiaroornartunillu sakkortuunik unammillerteqarusunngitsunit "eskimuutut unatarneqartarsimanerat" pissutaasoq.
Iligiinneq illernanngitsoq
- Tamanna pinerluttut politiillu akornanni illernanngitsumik iligiinnertut taaneqarsinnaagunarpoq, Karsten Lauritzen MetroXpressimi klumme-imi naliliivoq, tassanilu ilanngullugu oqaatigalugu oqariartaaseq taanna alutornarluinnartutut isumaqarfigigini.
Karsten Lauritzenili aamma isumaqarpoq Danmarkimi pissutsinut atatillugu assersuut atorneqarsinnaasoq, tamaanimi haship killilersugaajunnaarnissaa piffissami sivitsortumi politikkikkut oqaluuserineqarpoq.
- Maani haship inerteqqutaajunnaarsinneqarnissaanik oqallinnerput eqqarsaatigalugu tamanna aamma soqutiginaateqarpoq, pinerlunniutigiunnaarneqarpat rockerit isertitaminnik millionerpassuarnik annaasaqarnissaat aamma arlalissuarnit tunngavilersuutigineqarmat. Kalaallit Nunaannimi assersuummit takutinneqartutut pinerlunniartartut niuerfik taama iluanaarnartigisoq iperarumanavianngilaat pinerlunniartarnertillu unitsikkusunnaviarnagu, allappoq.
Feeriarfissat allat
Karsten Lauritzen isummersorfimmini aamma allappoq, annaassiniarnikkut upalungaarsimaneq Illersornissaqarfiup Kalaallit Nunaanni akisussaaffigisaa tatigivallaanngikkini.
- Ilumoortoq unaavoq, ajutoortoqaraluarpat taakkualu (umiarsuit takornariartaassuit, aaqq.) ilulissamut aporpata ikkarlippataluunniit umiarsuup ataatsip nalinginnaasumik ilaasuisa 2-3.000-it missaanniittut annaanniarnissaannut naammassisinnaasat amigarluinnassagaluarmata. Taamaattumik aappaagu feeriarnissami issittumi umiarsuarnut takornariartaatinut ilaalluni angalanissaq immaqa isumaliutigeqqaartariaqarpoq.