Peqqumaasivik ammarpoq

Puisip neqaanik frikadellit nunatsinneersunik naatsiianik salatillit, aalisakkanik lasagne, tamulugassat tassaasut paarnat, ammassaat panertut, aalisakkanik qajuliat kiisalu tartelettit raajanik, uillunik pupinnillu immikkat mamartumik miseqqerlugit sassaalliutigineqartut.

Allatut oqaatigalugu kujataani Food Festival Nanortalimmit ammarneqarmat mamartuliappassuit uuttugassaapput.

Tamanna pivoq arfininngornermi Nanortalimmi Piareersarfimmi ilinniartut nunatta pissarititaannik mamartuliorsimallutik illoqarfimmilu innuttaasunut qaaqqusanullu sassaalliutigalugit.

- Qaqqavut, narsaativut kangerluillu nerisassanik pitsassuarnik ulikkaarput, nunalerineq savaateqarnerlu tulluussimaatissaallutik. Immitsinnut pilersornerunissarput anguniagaraarput, inuiaqatigiimmi aningaasaqarnerannik pitsanngoriartortitsisussaavoq. Nerisassat inuunitsinni qitiupput. Pisuussutit atorluarneqarfigisaanni nunasisarpugut najugaqartarlutalu, Kommune Kujallermi inuussutissarsiornermut suliffeqarnermullu ataatsimiititaliami siulittaasoq Kalistat Lund oqarpoq.

Kingorna naalakkersuisunut ilaasortat Ane Hansen aamma Ove Karl Berthelsen oqalugiarput. Oqaatigaat kujataamiut anguniagartik piviusunngortissimavaat, kommunillu allat aamma taamaaliortariaqartut:

- Inuppassuit isumassarsiaminnik taaguisarput piviusunngortinngikkaluarlugit, kujataanilu isumassarsiat piviusunngortinneqarsimapput. Neriuppugut isuma taamaattoq nunatta sinneranut tuniluutissasoq. Naatsiianik naatitsineq nunap immikkoortuiani suliniutimut assersuutissaqqippoq.

Inuit 65 - 70 missaanniittut silagissuup ataani Piareersarfiliarsimapput. Kingorna katersortarfimmi innuttaasunik ataatsimiisitsinermi naalakkersuisut siulittaasuat Kuupik Kleist aningasaqarnermullu naalakkersuisoq Maliina Abelsen ataatsimiisitsisuullutik.