Nanortalimmi illuliassat taamaatiinnarneqartut
Ineqarnermut akiliutit qaffasippallaartussanngormata Nanortalimmi sisamanik illuliornissamut suliariumannittussarsiuussinissaq taamaatiinnarniarlugu naalakkersuisut aalajangerput
Nanortalimmi illussat sisamat pilersaarutaasut piviusunngortinneqassanngillat.
Nanortalimmi ilaqutariinnut illut sisamat sananeqarnissaasa suliariumannittussarsiuunneqarnerat taamaatinniarlugu Naalakkersuisut aalajangerput. Neqeroorutit tiguneqartut qaffasippallaarnerat, suliassallu piviusunngortinneqarnerini ineqarnermut akiliutit qaffasippallaalernissaat, taamaalillunilu inissiat attartortinnissaasa ajornakusoornissaa tamatumunnga pissutaavoq.
Taama ineqarnermut, attaveqarnermut angallannermullu naalakkersuisoq Jens B. Frederiksen, Demokraatit, nassuiaateqarpoq.
- Sapaatip-akunnerani kingullermi illoqarfimmi illut sananeqarnissaat suliariumannittussarsiuunneqarpoq. Suliassaq suliassanut arfineq-marlunnut immikkoortillugu neqerooruteqartitsivigineqarpoq. Suliassaq 1 Nunagissaaneq aamma suliassaq 2 betonilerineq ajoraluartumik neqerooruteqarfigineqanngillat. Suliassanik pingasunik ataatsimut angisuunngorlugu suliaqarnissamut neqeroorummik, aamma tamakkiisumik suliaqarnissamut neqeroorummik, 9.828.050 koruuninik naleqartumik tigusaqartoqarpoq. Tamakkiisumik suliaqarnissamut neqeroorut sanasunut m2-mut 30.240 koruuninik akeqassaaq, taakkununngalu pilersaarusiornermut, sanatitsisut nakkutilliinerannut aningaasalersuinermullu aningaasartuutit ilanngunneqassapput, Jens B. Frederiksen nassuiaavoq.
- Akit qaffasinnerat pissutigalugu suliariumannittussarsiuussineq taamaatinneqassasoq aalajangiisoqarpoq, sananermut aningaasartuutit qaffasinnerat ineqarnermut akiliutit qaffasinnerannik, taamaalillunilu inissiat attartortinnissaasa ajornakusoorneranik nassataqartussaammat.
Nanortalimmi inissiat pitsaanerit
Jens B. Frederiksenili naapertorlugu Naalakkersuisut Nanortalimmi illoqarfimmi nutarterinerat unitsinneqanngilaq – taamaanngilluinnarpoq.
Piffissami aggersumi Nanortalimmi Namminersorlutik Oqartussat inissiaataat attartortittakkat iluarsaanneqassapput, taamatullu typehusip nutaap, Illorput 2000-itoqqamut taartaasussap Kalaallit Nunaata kujataani misiligummik sananeqarnissaa sulissutigineqassaaq.
Taamaattumik Nanortalimmi nunaminertat ilaqutariinnut illunut sanaffissatut eqqarsaatigineqartut Illorput 2100-nik, misiligutaasussanik marlunnik nutaanik sananissamut atorneqarnissaat pillugu Ineqarnermut Naalakkersuisoqarfiup Kommune Kujalleq oqaloqatiginiarpaa.
- Suliariumannittussarsiuussinermik taamaatitsineq tamatigut alianartarpoq, kisiannili ataatsimut isigalugu erseqqissassallugu uannut pingaaruteqarpoq, Naalakkersuisuni eqqortunik, inuiaqatigiinnut tamarmiusunut iluaqutaasussanik aalajangiinissarput pingaartikkatsigu. Taamatut aalajangiisarnerit nuannarineqanngissinnaapput, kisiannili taamaakkaluartoq taamatut aalajangiinissamut qunusuissuseqarnissap pisariaqarnera minnerulissanngilaq – naalakkersuisunut ilaasortaq Jens B. Frederiksen oqarpoq.