Napparsimasunut akunnittarfik atoqqaarfissiorneqassaq
Nuummi napparsimasunut akunnittarfittaaq 60-inik siniffeqarpoq, agguataarsimasut ininut kisimiittarissanut 20-nut marluuttarissanullu 20-nut
Ataasinngormat peqqissutsimut naalakkersuisup Agathe Fontainip, Inuit Ataqatigiit, peqqinnissaqarfiup Nuummi napparsimasunut akunnittarfittaava atoqqaarfissiussavaa.
- Atoqqaarfissiortitsinissaq qilanaaraara. Nunatsinni peqqinnissaqarfimmut innuttaasunullu ulloq pingaarutiliuvoq. Napparsimasut akunnittarfiannik nutaamik sananissaq pingaartitarisimavara, iluarusunnartorujussuuvorlu napparsimasunut Nuummut katsorsartikkiartortunut pitsaalluartunik atugassaqartitsisinnaaleratta, Agathe Fontain tusagassiorfinnut nalunaarutikkut oqarpoq.
Napparsimasut akunnittarfittaavat 2880 kvadratmeterinik angissuseqarpoq arfineq-marlunnik quleriilik, kimmut Sanabugtimut kangimullu Sermitsiamut isikkiveqarluni. Siniffiit 60-iupput agguataarsimasut init kisermaattarissat 20-t marluuttarissallu 20-t - tamarmik namminneq uffarfillit perusuersartarfillillu, siniffiliortinnissamullu periarfissaqarpoq. Tassani najugaqartartussat errorsisarfimmik, pinnguartarfimmik timigissartarfimmillu atuisinnaapput. Napparsimasut akunnittarfiannit Dronning Ingridip Napparsimmavissuanut toqqaannartumik iseriartortoqarsinnaavoq.
Katiina nutaaq
Aamma tassaniissaaq Dronning Ingridip Napparsimmavissuata kantiinaa nutaaq, taannalu septembarimi ammarpat kantiinatoqaq matussaaq. Nutaatut napparsimmavimmi sulisut namminneq kantiinaqalissapput. Novembarimit kantiina napparsimasut akunnittarfianni najugallit nerisassiuuttalissavai.
Napparsimasut siulliit septembarip 4-aanni nuussapput, novembarillu aallaqqaataani napparsimmavimmut pingaarnerusumik isertaritaq saaffiginnittarfilik telefonimillu nuutsisarfilik illumut tassunga nuussaaq.
Napparsimasut akunnittarfiat sananeqarsimavoq entreprenøritut ingerlatsivimmit EMJ Grønlandimit, illoqarfimmi siunnersortit saniatigullu entreprenørit arlallit suleqatigalugit. Sanaartortitsisumut siunnersuisuusimapput Ini Byggeteknik A/S aamma TNT Nuuk.
Napparsimasut akunnittarfiata atoqqaarfissiornissaanut, ataasinngorpat septembarip 3-anni nal. 14 pisussamut, soqutiginnittut tamarmik tikilluaqquneqarput.