Issittumi ingeniørinngortoq

Tuperna Rix Danmarks Tekniske Universitetimi (DTU) Arktisk Teknologimi diplomingeniøritut soraarummeerusiamini angusarissaarluni marlunngornermi aggustip 28-ani angusivoq.

Tuperna Rixip misilitsinnermini soraarummeerusiani ’Aappaluttumi aatsitassarsiorfiliornissamik pilersaarusiorneq’ True North Gems suleqatigalugu ingerlassimasani saqqummiuppaa. Tamatuma kingorna apersuisoqarpoq oqallittoqarlunilu akunnerit marlussuit ingerlareermata Tuperna Rix 10 karakterilerneqarluni. Taamaalilluni Tuperna Rix Nunarsuup sananeqaataani - Sanaartornermi Aatsitassanilu immikkut ilisimatusarsimasuni issittumi ingeniørini siullersanngorpoq.

Tamanna pingasunngornermi ualikkut nalliuttorsiutigineqarpoq Sisimiuni Center for Arktisk Teknologi, DTU, Sanaartornermik Ilinniarfimmi Tuperna Rixip nalliuttorsiutigneqarnerani ilassinnitsitsimmat kommunimi ilinniarfimmillu sinniisut ilaquttat ilinniaqatillu peqataaffigisaannik.

Siullerpaajuneq unammilligassaavoq
Ilinniakkamut aqutsisup Hans Peter Christensenip Tuperna pilluaqquaa Center for Arktisk Teknologiimillu pisortanngortussap Carl Egede Bøggildip inuulluaqqussutaa atuarlugu, tassani ilaatigut allassimalluni siullerpaajuneq tamatigut unammilligassaasartoq, kisianni nunatsinni aatsitassarsiornermik suliaqarfiup ineriartortinnissaanut atatillugu maligassiuisuusoq.

Tuperna Rixip iluatsilluartumik soraarummeerneratigut issittumi ingeniørit katillugit 36-t ilinniartinneqarsimalerput, taakkunannga 18-it nunatsinneersuullutik amerlanerpaartaallu nunatsinni suliffeqalersimallutik. Ukiup affaa qaangiuppat immikkut ilisimatusaammi nutaami Illoqarfik, Pilersaarusiorneq Avatangiisillu siullerpaajusoq alla naammassissaaq.