Helle illoqarfimmi pisuttuarpoq
Nuummi GU-mi inuppassuarnik peqataaffigineqartumik ataatsimiinnerup kingorna Helle Thorning-Schmidt seqinnarissuup ataani illoqarfimmi pisuttuarpoq
Helle Thorning-Schmidtip (S) ualeq manna Nuummi GU-mi ilinniartut untritilikkaat apeqqarissaaqisut nuannarinnittullu naapippai, naalagaaffeqatigiinnerlu pillugu apeqquterpassuit akissuteqarfigeqattaarlugit.
Inuusuttut ilaatigut paaserusuppaat Kalaallit Nunaat nammineq Tunngaviusunik Inatsisitaarsinnaanersoq, Danmarkimik Savalimmiunillu naalaaffeqateqarneq attatiinnaatigalugu.
- Qanorluunniit pisoqaraluarpat ikinngutigiittuaannasaavoq, Helle Thorning-Schmidt oqarpoq.
Oqallinneq suli iluamik aallartinngitsoq ministeriunerup oqalugiarnermi ilaa atorpaa inuusuttunut toqqaannartumik oqalugiarluni kajumissaarlugillu ilinniagassatik ilinniartaqqullugit.
- Ulluni kingullerni marlunni Kalaallit Nunaanni angalasimavunga. Nuna tupinnaannartumik angisoorujussuuvoq alianaatsorujussuullunilu. Aammattaarli nuna inukitsuulluni. Tamanna pissutigalugu kikkut tamarmik annertuumik nammatassaqarput. Kikkut tamarmik ikiuutissapput. Aamma ilissi! Pikkorissarnissassinnut tamaviaassaasi suliuartuarlusilu. Siunissami annertuunik unammilligassarpassuaqassaaq. Apeqquterpassuaqarpoq akissutisisariaqartunik. Apeqqutit tamakkua akinissaannut unammilligassallu tigunissaannut piumassuseqarneq, qunusuissuseq pikkorissuserlu pisariaqarput.
Akunnerup ataatsip missaani inuusuttut peqatigereerlugit Helle Thorning-Schmidt seqinnarissuup ataani pisuttuarpoq. Illoqarfimmi biilimik angallanneqartussaagaluarpoq, silaginnerali pissutigalugu pisuttuarusunneruvoq.
Nuutoqqamut pisuttuarpoq tassani ministeriunerup illutoqat kusanartut qimerluualaarlugit. Aamma neriniartarfik Nipisa iserpaa, unnugulu Hans Egedep Illuani nerersuartoqassaaq.
THORNINGIP NAALAGAAFFEQATIGIINNERMUT ISUMAI TALLIMANNGORPAT SERMITSIAMI ATUAKKIT