- Kalaallit Nunaat sumiginnarnagu
Nunanut allanut ministeriusimasoq Uffe Ellemann-Jensen isumaqarpoq Kalaallit Nunaanni aatsitassat aatsitassarsiornerlu pillugit Danmarkip Kalaallit Nunaatalu akornanni oqallinneq sangusoorpallaarsimasoq
Kalaallit Nunaanni nunap iluani pisuussutit ilimagineqartut eqqarsaatigalugit Danmarkip naalagaaffiata aamma Namminersorlutik Oqartussat akornanni pissutsit pillugit oqallinneq aallaqqaammulli sangusoorpallaarsimavoq.
Taama nunanut allanut ministeriusimasoq Venstreneersoq Uffe Ellemann-Jensen Berlingske-blog-imini allappoq.
- Danmark aningaasanik amerlanernik pissarsitinniarlugu Kalaallit Nunaata Danmarkillu akornanni namminersorneq pillugu isumaqatigiissutip isumaqatigiinniutigineqaqqinnissaanik kissaatinik saqqummiussisoqarpoq- naak isumaqatigiissut ukiualuinnarni taamaallaat atuussimagaluartoq. Taamatut oqallinneq naleqqutinngilaq naalagaaffeqatigiinnermilu Danmarkip soqutiginninnerata annikippallaarneranik eqqugaaqqareersumi pissutsinut siuarsaataanaviarani.
- Pinngortitami pisuussutaasinnaasunik iluaqutiginninneq pineqartillugu agguataareriaatsit erseqqilluinnartut isumaqatigiissutigineqarsimapput, tamannalu allanngortinniarneqalertariaqanngilaq milliarderpassuarnik nalilinnik periarfissat aviisini allaaserineqaannarmata. Ministeriunerup Politikenimi apersorneqarluni oqarnerata "aatsitassanut nalinginnaasunut tunngasut namminersorlutik oqartussanit akisussaaffigineqarnerat" aamma aalajangersimasuuvoq, Uffe Ellemann-Jensen allappoq.
Læs også "Helle: Retten til Grønlands råstoffer ligger fast"
Læs også "Kuupik: Genforhandling er ”gak i låget”"
Danmark sumiginnaassanngilaq
Politikerip misilittagartuup allaaserisamini aamma aatsitassat qaqutigoortut pingaartumillu Kinap Kalaallit Nunaannik soqutiginninnerujussua iserfigai.
- Aatsitassanik qaqutigoortunik siunissami suliffissuarnut pingaarutilerujussuusussanik qalluineq pineqartillugu assersuutigalugulu Kinap kisermaassisungajattut inissisimaneranik nukittorsaanissamut periarfissat pineqartillugit "niuernerpalaarluinnartumik" suleriaaseqarnissaq naammanngilluinnarpoq. Kinami siunissaq ungasissoq pilersaarusiornerlu tunngavigalugu suleriaaseqarpoq - tamanna assersuutigalugu Afrikami takuarput - tamatumanilu Kalaallit Nunaat siunissami nunarsuarmi pissaaneqarnerup ilusilersugaanerani pingaaruteqarluinnarpoq.
- Kalaallit Nunaata sumiginnarneqannginnissaa eqqarsaatigalugu Danmark tamatumani akisussaafferujussuaqarpoq. Qujanartumik piumasaqaatit Danmarkimi illersornissaqarfiup nunap namminersortuuneranik suliassarpassuarnillu isumaginninnissamut piginnaaneqarnissaanut tunngasut eqqumaffigineqarluarput, taakkuami Issittup soqutigineqarnerata annertusiartornera ilutigalugu ukiuni aggersuni annertusiartussapput – kisianni aatsitassarsiornissamut il.il. akuersissutit Kalaallit Nunaanni aningaasaqarnermut isumaginninnikkut soqutigisanut kiisalu naalagaaffeqatigiinnerup inissisimaffeqarnikkut soqutigisaanut iluaqutaasumik inissisimatinneqalernissaannik apeqqutini kalaallinut ikiuunnissaq aamma atorfissaqartinneqarpoq, Uffe Ellemann-Jensen allappoq.