Usit suli agguaanneqarsinnaanngillat

Sapaatip akunneri marlunngungajalerput Vega Sagittarius Nuup avataani ikkarlinneranit. Suli nalunarpoq atuisut usinik umiarsuakkut ingerlaartitaminnik qaqugu pissarsisinnaanissaat.

Soorlu siornatigut eqqaaneqareersoq ikkarlinneq tassaavoq Havari Grosse - ataatsimoorluni ikkarlinneq - isumaqartoq usit umiarsuarmiittut tamarmik umiarsuaatilinnit Vegamit taakkualu sillimmasiisarfiannit akisussaaffigineqalernerannik, Royal Arctic Line nittartakkamini ilisimatitsivoq.

Umiarsuaatileqatigiiffiup paasissutissat Vega Sagittariusimit pissarsiai naapertorlugit qanoq pisoqarnissaanik ilisimatitsissutigineqartut ingerlateqqinneqarput taakkuali Royal Arctic Linemit akisussaaffigineqanngillat:

• Containerit Vega Sagittariusip nassatai tamarmik Nuummut nunalinneqarput

• Umiarsuarnik ikkarlittunik ingerlatsisartut Smit Salvage naatsorsuutigaat umiarsuaq pingasunngornermi sisamanngornermiluunniit ikkarliffimmit kaanngartissinnaassallugu

• Smit Salvage Usit tamarmik Vegamit taakkualu sillimmasiisarfiat SKULD Hamburg aamma ikkarlittunik annaassiniaasartut Smit Salvage tigummineqalerput

• Aatsaat ikkarlinnermit aningaasartuutit naatsorsorneqareerpata, usinillu piginnittut imaluunniit taakkua sillimmasiisarfiisa qanoq annertutigisumik akileeqataanissaat naatsorsorneqareerpat, usit atuisunut tunniussuunneqarnissaat naatsorsuutigineqarpoq

• Sillimmasiisarfiit ulappupput usit sukkanerpaamik piginnittunut tunniunneqarnissaat anguniarlugu

Royal Arctic Linep usit pillugit nutaarsiassat sukkanerpaamik nittartakkakkut saqqummiutissavaat, umiarsuaatillit Vega imaluunniit taakkua sillimmasiisarfiannit tusarlerneqarunik.

Umiarsuaatillit ajuusaarutigaat maannakkut nutaarsiassaateqannginnertik kiisalu atuisumik ikkarlinnermut tunngatillugu atugarliortinneqarsimassagaluarpata.