Inuiaqatigiinni oqallinnitsinnut immikkut atortussatsinnik, qujanaq

- Suliniummik taassuminnga kissaatigaarput Kalaallit Nunaata ineriartornera pillugu oqallinnermik pilersitsinissaq. Qanoq isilluni pinngortitap pisuussutai ilisimatusarfigineqassappat atorneqarlutillu, qanorlu isilluni naalagaaffik nutaaq ineriartortinneqassava avatangiisit attatiinnarlugit tamannalu peqatigalugu inuiaqatigiit tulluartumik ineriartortillugit.

Kalaallit Nunaata suliniussuanik ataqatigiissaarisoq, ujarassiornermi ilisimatooq Minik Rosing taamatut nassuiaavoq, saqqummersitamut "Possible Greenland"-imut atatillugu, taannalu ukioq manna Venedigimi akitekturbiennale-mi qallunaat takutitsivianni sammineqarpoq. Saqqummersitsineq, ilisimannittunit taaneqartartoq illlulioriaatsimi, illoqarfinnik ineriartortitsinermi sanaartornermilu saqqummersitsivittut nunarsuarmi pingaarnersaattut ataqqinarnersaattullu.

Kusanartut, nalissaqanngitsut - allanngortinneqarsinnaasullu - Rosingip siunertatut oqaasii amerlanerusunit isumaqatigineqarunartut. Itinerusumik isigalugu.

Kalaallilli inuiaqatigiit - pingaartumillu politikerit inuussutissarsiortullu - sammisat pingaarutilerujussuit oqallisigilinnginneranni, soorlu attaveqarneq, eqiterineq atasinnaassuserlu, qallunaanut kalaallinullu suleqatigiinnut "Greenland Possible"-mik suliarinnittunut suliassaasimavoq suliniutip siunertaata piviusunngorlugu takusassiarineqarnissaa.

Unammilligassaq imaannaanngitsoq, eqqarsaatigissagaanni saqqummersitsineq, ukiup nutaap aallartinnerani aamma Nuummut pisussaq, nunani tamalaarmiunut takutinneqartussaq, inuiaqatigiitsinnik killilerujussuarmik ilisimasalinnut.

Saqqummersitsineq kusanartoq isumassarsinartorlu
Sermitsiaq.AG ulluni kingullerni aasarissuarmi kiattumi Venedigimiippoq, ukioq manna biennalep ammarneqarneranut atatillugu, tassani qallunaat takutitsiviata aatsaat siullermeersumik Kalaallit Nunaat sammitillugu. (Nalaatsornerinnaanngilaq marlunngormat pisortatigoortumik ammasuummat MInik Rosingip ikinngutigilluagaanit kunngissamit Frederimmit).

"Preview days"-inik taaneqartartut ingerlaneranni, tamatumani pingaartumik illussanik titartaasartut tusagassiortullu nunarsuarmit tamarmeersut 2500 missaanniittut Kalaallit Nunaannik tipisiorsinnaaffianni, Sermitsiaq.AG-p ersarissumik maluginiarpaa Kalaallit Nunaat pillugu saqqummersitsineq kajungerineqartoq. Inuit oqaloqatigisavut tamarmik taamatut oqaluttuarput, naammattooraangatsigit titartakkat, takussutissiat allallu qalipaatigissut, angisuut, paasissutissiisut tinnersaasullu saavini, assigiinngitsumik sammisamik sammititsisut, inuit takunnittut annertunerusumik annikinnerusumilluunniit pinngitsaalillugit eqqarsaatigissagaat. Immaqalu isummerfigalugit.

Aamma atuaruk ”Nunarput pillugu saqqummersitsineq nunanit allamiunit nersorneqaqisoq”

Aamma takukkit ”Assit: Nunarsuarmiut Nunarput imatut takorusuppaat”

Immaqa inuit aperisavut inussiarnerniaannarlutik pitsaasumik akissuteqartarput. Immaqaluunniit naamik. Tamarmilli assigiissumik oqartarput Kalaallit Nunaata siunissaanik suliniutissatut isumassarsiatut takorluukkat tupaallaatigalugit.

Inuiaqatigiit oqallinnerannut atortussat amerlanerusut
Suliniut "Possible Greenland" Nunatsinni isorinnittunit oqaatiginiarneqaraluartoq "suliniutit ingasaassat, inunnit ilisimasaqanngitsunit Nunatta avataaneersunit, nunatsinnik ilisimasaqartorujussuartut isumaqartunit, suliarineqarsimasut", taava qallunaat-kalaallit takutitsiviat takuniarlugu isumassarsiornartorujussuuvoq. Suliniutit, tamakkua ilaminiinnanngui imaluunniit arlaannaalluunniit pinnani siunissami piviusunngortinneqassagaluarpataluunniit.

"Possible Greenland"-imik suliniutillit tamarmik annertuumik kusanartumillu suliaqarsimapput, neriunartumik inuiaqatigiit pillugit oqallinnitsinni immikkut atortussatsinnik tunniussillutik.

Tamanna aaqqissuisoqarfimmi neriuutigaarput. Oqallitta!