Royal Greenlandip sulisut 70-t angerlartippai
Royal Greenlandip Qasigiannguani suliffissuani sulisut 70-t missaanniittut angerlartinneqarput. Suliassaqanngillat, suliffeqarfissuaq oqarpoq
Qasigiannguani Royal Greenlandip suliffissua tunisassiassaaleqisorujussuuvoq. Tamatumanilu sulisut sakkortuumik eqqorneqarput. Angerlarartinneqarput.
- Soorunami tamakkununnga sakkkortoqaaq, qanorli iliorsinnaanngilagut. Tunisassiassaateqanngilagut, suliffissuup pisortaa Ole Vestergaard ualeq manna Sermitsiaq.AG-mut oqarpoq.
knr.gl naapertorlugu sulisut nuanniitsumik tamatuminnga sapaatip akunnerani kingullermi nalunaarfigineqarput. Aggustimili suliffissuarmi sulisut ikilisinneqarsimapput, qaleralinnik tunisineq unimmat.
Ole Vestergaardip Sermitsiaq.AG-mut erseqqissarpaa suliffissuaq tamakkiisumik ingerlatseqqilissasoq septembarip qiteqqunnerani.