Tusilartunut atugassarititaasut ilungersunartut sammineqalersut
- Kalaallit Nunaanni tusilartuuneq ilungersunartorujussuuvoq, tusilartut sapaatip-akunnerani matumani kingusinnerusukkut isumasioqatigiinnissaannut aaqqissuisut ilaat oqarpoq. Tusilartut nunanit avannarlerneersut peqataassapput
Ulluni aggustip 29-anit 31-anut nunani avannarlerni tusilartut pillugit siullermeerluni Nuummi isumasioqatigiittoqassaaq. Isumasioqatigiinneq nunani avannarlerni tusilartut siunnersuisoqatigiiffiata DNR-ip aaqqissuussaraa peqataasussallu tassaapput tusilartut nunatsinnit, Sverigemit, Finlandimit, Danmarkimit, Savalimmiunit, Islandimit Norgemillu aggersut. Nunatsinnit tusilartut 24-t nunatsinnit tamarmeersut peqataassapput. Isumasioqatigiinneq ilaatigut siunertaqarpoq Kalaalit Nunaanni Tusilartut Kattuffiata 2011-mi pilersinneqartup qanoq ililluni tapersersorneqarnissaanik ataatsimut qimerluuinissaq.
Naalakkersuisut peqataassasut
Isumasioqatigiinnermut peqataassapput Ilaqutariinnermut, Piorsarsimassutsimut, Ilageeqarnermut Naligiissitaanermullu naalakkersuisoq Mimi Karlsen aamma Peqqissutsimut naalakkersersuisoq Agathe Fontain, tamatumanilu Kalaallit Nunaanni tusilartunut pissutsit ungasinnerusumi qanoq pitsanngorsarneqarnissaannik oqaluuserinninnissaq. Sammisassani qitiutinneqartussat ilaatigut tassaapput attaveqatigiinneq, ussersorneq, ilinniartitaaneq suliffeqarnerlu inuiaqatigiinnilu neqeroorutit allat.
Isumasioqatigiinnermi videokkut ungasianiillu nutsereriaatsip iluani teknologiip nutaap qanoq Kalaallit Nunaanni atorneqarsinnaanera qanimut misissorneqassaaq. Taamaalillutimmi tusilartut ullumikkornit ajornannginnerusumik aningaasartuutaannginnerusumillu ussersornikkut nutserunneqarsinnaalissapput. Taamaattumik Danmarkimit oqalutseqarnermut oqartussat Den Nationale Tolkemyndighed aamma Tele Greenland isumasioqatigiinnermi oqallinnermut aamma peqataassapput.
Nunatsinni tusilartut qanoq pitsaanerusumik siunissaqalissappat?
- Kalaallit Nunaanni tusilartuunerup ilungersunarluinnartuunera qularutissaanngilaq. Tusilartut ussersuutaannik ilinniarsimasoq ataasiinnaavoq, nuna isorartoorujussuulluni tusilartullu ussersornermik atuisunik allanik peqateqarnissamut periarfissakitsuaraallutik. Tusilartunut pissutsit qanoq pitsanngorsarneqarsinnaanerat nunat avannarliit allat peqatigalugit misissorusupparput, Danmarkimi tusilartut kattuffiannut, Danske Døves Landsforbundimut siulittaasoq Janne Boye Niemelä oqarpoq.
Nunatsinni tusilartut ussersuutaannik atuisut ullumikkut 20-t missaanniipput. Apriilip 27-ani 2010-mi Nuummi tusilartut peqatigiiffiat Siuteq pilersinneqarpoq, 2011-mi Kalaallit Tusilartut Kattuffiat KTK pilersinneqarluni.