Atassut: Inunnik paasissutissiineq nukittorsartariaqarparput

Naalakkersuisut periarfissaminnik nalileeqqittariaqarput. Inuiaqatigiit ammasut pilersinniaraanni KNR-imi soraarsitsinerit atortariaqanngillat, Atassummit Steen Lynge oqarpoq

KNR nukittorsartariaqarpoq - sanngiillisarneqarani, Atassut isumaqarpoq. Assi: Hans Jukku Noahsen

Atassut isumaqarpoq naalakkersuisut IA aamma Demokraatinit aqunneqartut oqaatsitik malinnagit allatut iliortartut.

Tamanna kingullermik takuarput tallimanngornermi KNR-imit nalunaarutigineqarmat sipaarniarnerit pissutigalugit sulisut aqqanillit soraarsinneqarmata. Naalakkersuisut KNR-imik tusaaniarsimanngillat, ukiuni kingullerni arlalinni naalakkersuisunik eqeersaaniaraluarput nutaarsiassaqartitsiviup aningaasaqarnera pitsanngorsaqqullugu nilliagaluarmat soraarsitsinerit atorfiillu inuttaqanngitsut inuttalersorneqarnissaat pillugit.

Taamak Sermitsiamut allappoq Steen Lynge Atassummeersoq. Itisiliillunilu:

Qinersinerup kingulliup kingorna KNR sulisunik ikilisaallunilu soraarsitsisarpoq maannakkut katillugit 27-nik. Tamassuma assigaa piffissap sivisunngitsup ingerlanerani KNR-imi sulisut sisamararterutaasa soraarsinneqarnerannik. Tamassuma nassataanik nutaarsiassat ikinnerit aamma inuiaqatigiinnut paasissutissiinerup ajorseriarneranik piffissami Kalaallit Nunaata allanngoriartorujussuarfiani aatsitassarsiorfissuarnik pilersitsinialeruttorfiup nalerpiaani. Taamaattumik pisariaqarluinnarpoq nutaarsiassaqartitsiviit, inuiaqatigiinnut kiffartuussiviit soorlulu nuna tamakkerlugu namminersortut nutaarsiassanik ingerlatsivii aqqutigalugit inuiaqatigiinnut paasissutissiinissap nukittorsarnissaa, Steen Lynge allappoq.

Inuit Ataqatigiit aamma Demokraatit qineqqusaarnermi kingullermi inuiaqatigiinni ammasuuneq isertuussaqannginnerlu eqqartorpaat, Steen Lynge tikkuaavoq allaqqilluni, nutaarsiassaqartitsivinni ikilisaanani nukittorsaasoqartariaqaraluartoq.

- Kalaallit Nunaanni nutaarsiassiinerup nukittorsarnissaa pisariaqarpoq tamanna anguneqartariaqarpoq pitsaanerusumik ilinniartitsinikkut aamma nutaarsiassaqartitsiviit aningaasatigut atugassaasa pitsanngorsarnerisigut. Naalakkersuisut suliassaqarfimmi tassani politikkertik eqqarsaatigeqqittariaqarpaat ineriartornermullu naleqqussarlugu, maannakkummi Kalaallit Nunaata ineriartornera eqqarsaatigalugu ammasuunissaq isertuussaqannginnissarlu pinngitsoorneqarsinnaanngitsumik pingaaruteqarput.

Powered by Labrador CMS