Upernassaru ulappunnersuaqassaaq
Inatsisartut upernaakkut 2013 ataatsimiinnissaat kommunimut aamma inatsisartunut qinersinerit akornanniissaaq
Politikerit aamma qinersisartut upernassaru ulapputissaqassaqaat.
Inatsisartut Siulittaasoqarfiata siunnersuutigaa Upernaakkut ataatsimiinneq 2013 tallimanngornermi marsip arfineq-pingajuanni aallartissasoq, kommunalbestyrelsini, nunaqarfinni aqutsisuni aamma ilagiit sinniisaannut marlunngorneq apriilip aappaanni qinersisussaavugut kingusinnerpaamillu arfininngorneq juunip aallaqqaataat Inatsisartunut qinersissalluta.
Politikerit arlallit angummeqqunniarnissaat ajornakusuussaaq, pissutigalugu Upernaakkut ataatsimiinneq marsip arfineq-aappaanni aallartinnissaa kommunalbestyrelsinut sisamaasunut ulloq apriilip aappaat qinersisoqartussaammat. Kommunimut qineqqusaarnissaq imaannaanavianngilaq, pissutigalugu upernassaru ukiut tallimanngorsimassagatsigit kommunimut qinersinermit kingullermit. Marlunngorneq apriilip arfineq-pingajuat 2008 siullermik kommunalbestyrelsiugallartussanik qinersinikuuvugut taamani januaarip aallaqqaataani 2009 kommunerujussuit atulermata kommunalbestyrelsivinnut ivertinneqarmata.
Arlalinnik qinigaaffillik amerlasuut
Maannamut inatsisartunut naalakkersuisunullu ilaasortanit 39-init 20 apriilimi 2008 kommunalbestyrelsiugallartunut qinigaanikuupput taakkunanngalu arlalippassuit suli kommunalbestyrelsini issiapput, allat soorlu naalakkersuisunut ilaasortat sulinngiffeqarnissaminnik qinnuteqarnikuusut. Politikerinit 20-nit taakkunannga arlallit marluinnik ilaasortaaffeqartunit aappaagu kommunalbestyrelsini issialeqqikkusullutik qineqqusaassamaartut qassiuneri suli ilisimaneqanngilaq, ataaniipporli apriilip arfineq-pingajuanni 2008 kommunimut qinersinermi qinigaasut maannakkut Inatsartuni aamma naalakkersuisuni issiasut.
Kommune Kujalleq: Debora Kleist, IA, Aqqaluaq B. Egede, IA.
Kommuneqarfik Sermersooq: Justus Hansen, D, Per Berthelsen, S, Doris Jakobsen, S, Astrid Fleischer Rex, D, Storm Ludvigsen, IA, Harald Bianco, IA, Jens B. Frdederiksen, D, Ove Karl Berthelsen, IA.
Qeqqata Kommunia: Karl Lyberth, S, Palle Christiansen, D, Mimi Karlsen, IA, Agathe Fontain, IA.
Qaasuitsup Kommunia: Hans Aronsen, IA, Isak Hammond, IA, Kristian Jeremiassen, S, Knud Kristiansen, A, Ane Hansen, IA aamma Anthon Frederiksen, KP.
Upernaakkut ataatsimiinneq immaqa taamaatiinnassaaq
– Ukiorpassuarni piffissaanngitsukkut qinersisarneq sungiutereerlugu piffissaatillugu qinersisarneq sungiuttariaqarparput, naalakkersuisut siulittaasuat Kuupik Kleist issatsiaq Sermitsiamut oqarpoq.
Apriilip aappaani kommunimut qinersinissamut qineqqusaarneq sivisooq, inatsisartunullu maajip naanerani qinersinissamut qineqqusaarneq takisooq marsimi aamma apriilimi Upernaakkut ataatsimiinnermik - marsillu naanerani poorskimi sulinngiffeqarnermik ilalik polikerit qineqqusartullu naammagittarsinnaassusaannik uuttuissapput sakkortussaqalunilu.
- Aap, upernaakkut 2013 suut tamarmik angusaqarfiulluassagunik pilersaarusioqqissaarnissaq pisariaqassaaq, Kuupik Kleist ilaliivoq.
Kalaallit Nunaanni pissaanerup pingasoqiusamik aggorneqarsimanerat nuannaarutigisarparput, inatsisiliornermik pissaanillit (Inatsisartut), pissaanermik ingerlatsisut (Naalakkersuisut) aammalu eqqaartuussiviit.
Taamaattumik Inatsisartut katersuunnissaminnut ullussarititanik aalajangiisarput naalakkersuisut siulittaasuata Kuupik Kleistip taamak pissaaneqartigaluni aamma Inatsisartunut qinersinissaq aalajangersinnaavaa Upernaakkut Ataatsimiinnissaq 2013 pinngitsoortissinnaallugu.
Inatsisartut Ukiakkut ataatsimiinnerat 2012 tallimanngorneq septembarip 21-at aallartikkuni siullertut aalajangiutissavaat Siulittaasoqarfiup siunnersuutaa, Upernaakkut ataatsimiinneq 2013 marsip arfineq-pingajuanni aallartissasoq. Oqallinnissap paasinarsisikkumaarpaa politikerit upernassamut ulapinnissaq qanoq isummerfigissaneraat.