Pisortat tunuartitat uteqqinnavianngillat

Peqqissutsimut aqutsisoqarfimmi pisortaaneq Kurt Nielsen, nakorsaaneq Carsten Thordal aamma peqqissaasut pisortaat Lisbeth Lumby Rasmussen marsip 25-anni atorfimminnit ingerlaannartumik tunuartitaanerisa kingorna, suliaq uissuuminartoq uparuartariaqaqisorlu sivitsortumik ingerlasimavoq.

KNR'ip tusarfii naapertorlugu Peqqissutsimut aqutsisoqarfimmi pisortaaneq Kurt Nielsen aamma Namminersorlutik Oqartussat akunnerminni isumaqatigiissutigaat pisortap Kurt Nielsenip soraarnissaa. Nakorsaaneq Carsten Thordal napparsimanini pissutigalugu sivisuumik sulinngiffeqartoq KNR naapertorlugu, atorfimminut uteqqinnginnissani aalajangiussimavaa. Suli peqqissaasut pisortaaneranut Lisbeth Lumby Rasmussenimut aalajangiisoqanngilaq.

Nalunaarusiortoqarnissaa piffissanngorpoq
Maajimi peqqissutsimut naalakkersuisoq Agathe Fontain, Inuit Ataqatigiit, oqarpoq Peqqissutsimut pisortaqarfik siusinnerpaami aggutsimi nunatsinni peqqissutsimut aqutsisoqarfimmi pisortaanerit tunuartinneqarnerannut tunngasoq nalunaarusiaq saqqummissasoq.

Pisortat tunuartitaannerannut pissutaavoq taakkua akissarsiassanik siumoortumik 2,8 million koruuninik immikkoortortaqarfinni nakorsanut, nakorsaanernut marlussunnut aamma peqqissaasuunernut atorfinnik nutaanut atorfininnerannut atatillugu akiliuteqarsimammata.

Ajornartorsiutaavoq aningaasat tunniunneqarsimammata isumaqatigiissut suli atuutilinngitsoq.