Festivalit danski tusaamasarsuaq tikisinnianngilaat
Medinap tusarnaartitsiartornissaminik taamaatitsiinnarnerata kingorna tusaamasamik danskimik allamik tikisitsiniarsarineq taamaatiinnarneqarpoq. Medinali suli immineerneqanngilaq
Medinamik paarlaasussamik nassaarniarluta ilungersoraluarpugut, ajoraluartumilli qaammat ataasiinnaq piffissaralugu allamik nipilersortussamik nassaarneq ajornakusoorpoq. Tamanna nassuerutigisariaqarparput.
Taamak oqaluttuarpoq Jens Berthelsen, Nuummi Timersortarfiit pisortaanerat, Aasianni Nipiaa Rock Festival suleqatigalugu Medinap marloriarluni tusarnaartitsinissaanik pilersaarusiorsimagaluartoq Nuummi aggustip 31-anni kiisalu arfininngornermi septembarip aallaqqaataani Aasianni.
- Nipilersortartut 13-it saaffigigaluarpagut soorlu ilaatigut Nik & Jay, Nephew, Big Fat Snake, Burhan G, Kato, Outlandish, Kandis, Lis Sørensen, Sanne Salomonsen aamma L.O.C., taanna aggerusukkaluarpoq nipilersoriaqattaarlunili angalaarnermi kingorna sulinngiffeqarnissaminik pisariaqartitsilluni aggersinnaanngilaq, Jens Berthelsen Sermitsiaq.AG-mut oqaluttuarpoq.
- Medinap piffissaq alla Kalaallit Nunaannukarsinnaaneranik eqqarsaatisi taamaatiinnarpisigit?
- Naagga, taamaaliunngilagut. Qaqugu pinerpoq tikisikkusukkaluaqaarput, Jens Berthelsen oqarpoq erseqqissaatigalugu Nuummi nipilersornermik festivalertitsinissami Dida, Diva, Discobay Blues aamma A Circumpolar Soundscape tusarnaartitsiumaartut.
Festivali Inussivimmi ingerlanneqassaaq tallimanngorneq aggustip 31-at aamma arfininngorneq septembarip aallaqqaataa.
Nipiaa Rock Festival Aasiaanni ingerlanneqassaaq sisamanngorneq aggustip 30-annit arfininngorneq septembarip aallaqqaataa tikillugu.