Silap pissusia: Nunatta suleqatigiinnissamik isumaqatigiissutaa siulleq

Suut tamarmik Danmarkip Nunattalu pilersaarutaat malillugit ingerlassappata, Kalaallit Nunaat nunani tamalaani siullermeersumik silap pissusianik Danmarkimik isumaqatigiissuteqassaaq.

Tamanna takuneqarsinnaavoq Danmarkip Nunattalu silap pissusianut suleqatigiinnissamik isumaqatigiissutaanni nutaami, pingasunngormat aggustip 15-ianni silap pissusianut nukissaqarnermullu ministerimit Martin Lidegaardimit aamma ineqarnermut, attaveqarnermut angallannermullu naalakkersuisumit Jens B. Frederiksenimit, Demokraatit, Nuummi atsiorneqartussami.

- Isumaqatigiissummi immikkoortut oqaatiginianngilakka pingasunngorpat isumaqatigiissut naalakkersuisullu tamanut saqqummiutsinnagu, Martin Lidegaard oqarpoq Sermitsiaq.AG-p Københavnimi allaffiani naapimmagu.

Silallu pissusianut nukissaqarnermullu ministerip isumaqatigiissummi immikkoortut oqaatigiumanngikkaluarlugit tunuartivinngilaa isumaqatigiissutikkut nutaakkut Kalaallit Nunaat annertunerusumik oqaasissaqartitaanissaa.

- Nunani tamalaani silap pissusanik isumaqatigiissutikkut siullikkut nassaariniarneqarpoq Kalaallit Nunaata namminersorlutik oqartussat iluanni qanoq silap pissusianut politikkimi annertunerpaamik sunniuteqarsinnaanersoq, silap pissusianut ministeri Martin Lidegaard oqarpoq, taassumalu Nunatsinnut angalanermini ullut arfinillit atorniarpai, silap pissusia pillugu isumaqatigiissutip atsiornerata saniatigut silap pissusianut nukissaqarnermullu ministereqarfiup Nunatsinni ingerlatai tikeraassallugit.

Silap pissusianut politikki Kalaallit Nunaata nammineq oqaasertalersussavaa
- Silap pissusianut politikkissani Kalaallit Nunaata nammineq oqaasertalersussavaa. Kalaallit Nunaart erngup nukinganik nukissiorfinnik sanalluni qanoq iliuuseqartorujussooreersimavoq silallu pissusisanut politikkimik sunniutilimmik ingerlatsisimallluni, neriuppungalu tamanna ingerlatiinnassagaa, Kalaallilli Nunaata nammineq toqqagassaraa, Martin Lidegaard erseqqissaavoq.

- Siunissaq siulittuutigiuminaappoq. Kalaallit Nunaat pilersaaruterpassuaqarpoq. Aamma aatsitassanik piiaanissap iluani annertunerusumik CO2-mik aniatitsisussami, neriuppungali Kalaallit Nunaat Danmarkitut paasinnikkumaartoq - tassa silap pissusianut pitsaasumik iliuuseqarneq aningaasaqarniarnermut pitsaasumik iliuuseqarnermut akerliunngitsoq. Taakkuami marluk imminnut ataqatigiipput, silap pissusianut nukissaqarnermullu ministeri oqarpoq.

FN-ip tullianik silap pissusianik isumaqatigiinniarnera, COP18, decembarimi Qatarimi ingerlanneqassaaq.