Telep siulittaasua: Søren kiffaanngissuseqarpoq
Siullermik Kalaallit Nunaanni atorfimmut qaffasissumut angerpoq. Taava piumajunnaarpoq. Maannakkut Danmarkimi atorfimmut qaffasissumut ivertinneqarnissaminut qulakkeerinnippoq. Susoqartoruna?
Søren Eriksenip Tele Greenland sianiinnaarpaa.
Taamak amerlaqisut eqqarsarput siornatigut DSB-mut pisortaanerusup attaveqaqatigiinnermik ingerlatsivimmi pisortatut atorfissamut ivertinneqarnissani ullualuit sioqqullugit tunuaannarnini nalunaarutigimmagu. Isornartorsiuisut pasinnissutigisamik ilumoornerat ullumi uppernarsarneqartorlusooq misigaat, paasinarsimmat Eriksenip pissarsiarisimagaa - qularnanngitsumik - atorfik akissaatigissaarluinnartoq Danmarkimi aningaasaateqarfimmi nutaami pisortatut atorfik.
Søren Eriksenip periuusianik kusanaaginninneq Tele Greenlandimi pisortaanerinit ilalerneqanngitsoq. Illuatungaani siulersuisut siulittaasuata Agner B. Markip Sermitsiaq.AG-mut oqaatigaa, pisortassatut tunuaannartumut ajortussamik eqqarsaateqaratik, naak taassuminnga upernaaq manna atorfinitsitsinermi annertuumik neriuuteqarsimagaluarlutik.
- Siornatigut AG-mut oqaatigereerpara uagutsinnit atorfinitsinneqaraluarnerminit tunuaannarnera ajoriffissaqartinnginnatsigu. Tamanna oqaatigeqqissinnaavara. Kamaatinngilara aamma pakatsinngilanga. Aamma maannakkut nutaamik atorfinittoq tusaraluarlugu. Søren ukiorpassuarni Danmarkimi inuussutissarsiornermi suliffeqartuusimavoq attavigisinnaasarpassuaqarluni. Kingusinnerusukkut atorfimmik sumilluunniit atorfinittussaanera takorloorneqareernikuuvoq. Oqaatigisariaqarparalu Søren allamik atorfininnissaminut kiffaanngissuseqarmat, Agner N. Mark nangippoq.
- Suliffimmit tunuaannarami inuttut ajornartorsiutit patsigai. Mannakkut inuttut ajornartorsiutini immaqa qaangersimagamigit atorfimmik ilungersunartumik suliaqarsinnaalerpoq?
- Inuttut ajornartorsiutit suuneri eqqaanngikkaluarlugit oqartoqarsinnaavoq nunap sumiiffia aamma apeqqutaasimasoq. Pissutsit aalajangersimasut aallaavigalugit ilaqutani ilagalugit Danmarkimit ungasissumi najugaqalersinnaannginnami, Agner N. Mark akivoq.
- Atorfittaava pillugu ilisimasaqarpit?
- Naaggarluinnaq. Aningaasaateqarfik siornatigut tusarsimanngisaannarpara aningaasaateqarfinnik arlalinnik ilisimasaqaraluarpunga. Takusinnaavarali Esbjergimi qullersaqarfeqartoq.
Pisortassaq qaammatit qassiit qaangiuppata paasinarsissaaq
Tele Greenland maannakkut ukiup ataatsip missaanni pisortaaneqarani ingerlavoq. Apeqqutaaginnarpoq sulisut Nuummi qullersaqarfimmi teqeqqumi allaffiup inuttalerneqarnissaannut qanoq sivisutigisumik utaqqisinnaanersut?
- Sørenip tunuaannarnissani aalajangiukkamiuk kingumut sulisussanik ujaasisartut uterfigeqqittariaqarpagut taakkualu ujaasillutik aallarteqqipput. Soorunami suut tamarmik kigaannermik ingerlasungapput aasakkut sulinngiffeqarneq pissutigalugu - neriuppungali naatsorsuutigalugulumi qaammatialuit ingerlaneranni pisortassamik nassaartoqarnissaa. Oqaatigiuminaappoq qanoq sivisutigisumik tamanna pissanersoq. Aamma apeqqutaassagami piukkunneqartussaajumaartoq nikinnissaminut piareersimassanersoq, Agner N. Mark oqarpoq.
Taassuma ilanngullugu oqaatigaa, atorfinittussamik ujaasisartut pisortassamik nutaamik ujaasinissartik aningaasarsissutigissanngikkaat. Isumaqatigiissummi ilanngunneqarnikuuvoq sulisussanik ujaasisartut piukkussaminnik innersuussaat allamik atorfineriataassagaluarpat aningaasartuutit ujaasisartut namminneq matussusissagaat.
Ilanngullugu oqaatigisariaqarpoq Tele Greenlandip Søren Eriksenip aallartinnissaanut piareersaasimagaluaqisut. Ilaatigut Nuutoqqami illorsuaq 287 kvadratmeterisut angissusilik nutartigaq piareersimatikkaluarpaat. Sermitsiag.AG-p ilisimasai naapertorlugit illorsuaq taanna suli inoqanngilaq - qaammaterpaalunni inoqarsimanani.
Sermitsiag.AG - iluatsitsigani - Søren Eriksen oqaaseqartinniarsimagaluarpaa. Ulloq naallugu sianertunik akinissaminut piffissaqarsimagunanngilaq.