Kuupik Kleist Nunavut tikeraarpaa
Naalakkersuisut siulittaasuat Kuupik V Kleist ulluni tallimani Nunavummi pisortatigoortumik tikeraarpoq
Naalakkersuisut Siulittaasuat Kuupik Vandersee Kleist sapaatip akunnerani uani tallimanngorneq 10. august 2012-p tungaanut pisortatigoortumik Nunavut-mut ullunik tallimanik sivisussusilimmik tikeraarpoq. Nunat taakku akunnerminni ukiumoortumik tikeraaqatigiittarnerannut maanna tikeraaneq ilaavoq, tassunga atatillugu nunat taakku marluk akornanni suleqatigiissinnaanermut periarfissat qulaajarneqassapput, pingaartumik Iqaluit aamma Nuup akornanni timmisartukkut aqqutip nutaap atuutilerneratigut periarfissatut isigineqarsinnaasut.
Pissutsit assigiinngitsut eqqarsaatigalugit Nunavut aamma Kalaallit Nunaat ukiuni aggersuni periarfissatigut unammilligassatigullu assigiimmik inissisimapput. Nunat taakku marluk pinngortitap pisuussutaatigut pisuujupput aatsitassarsiornerullu tungaatigut ilinniarsimasunik sulisussanik annertuumik pisariaqartitsillutik.
Nunat taakku silap pissusaatigut aamma isorartuussutsikkut unammilligassaqarput, attaveqaatitigut annertuumik piumasaqaateqartumik. Taamaattumik Naalakkersuisut Siulittaasuata Kuupik Vandersee Kleistip aamma Nunavut-mi Naalakkersuisut Siulittaasuata Eva Aariak-ip nunatut akileriinneq nukittorsarusuppaat niuernikkut aamma aningaasaqarnermi attuumassuteqarnikkut, aatsitassatigut, Issittumi Siunnersuisoqatigeeqarnikkut, attaveqaatitigut ilinniartitaanermilu suleqatigiinnikkut periarfissat samminerulernerisigut.
Aalisarnerup nunanut taakkununnga marlunnut pingaaruteqarnera aamma malunnartinniarneqarpoq aalisartoqarfik Pangnirtung Nunavut-ip kangianiittoq tikeraarneqarmat.