Nanortalimmi atuarfik nutaaq atoqqaartinneqartoq
Sisamanngornermi aalisakkanik tunisassiorfik Nanortalimmi ammaqqinneqarpoq tallimanngornermi atuarfik nutaaq atoqqaartinneqarpoq
Nanortalimmi ingerlalluartoqarpoq.
Tassa sisamanngornermi aalisakkanik tunisassiorfik ammaqqinneqarpoq, illoqarfiup atuarfittaava Nanortallip Atuarfia, tallimanngornermi atoqqaartinneqarluni.
Atuarfiup pisortaa Paul Raahauge atuarfik nutaaq kommunalbestyrelsemut qutsatigalugu, Kalaallit Nunaanni nutaaliaanerpaanut ilaaasoq, elektroniskiusunik allattarfilik aamma inini atuartitsiviusuni tamani IT periarfissaalluni. Tamatuma kingorna borgmester Simon Simonsen atuarfinnut- aamma meeqqanik paaqqinnittarfinnut ataatsimititaliap siulittaasuata Kaj Lyberthip oqalugiaataa atuarpaa, taassuma pingaartippaa atuarfik Atuarfitsialaap anersaava aallaavigalugu atuarfittaaq sananeqarsimammat.
Simon Simonsen nammineq Nanortallip atuarfiani atuarnikuuvoq, oqarneratut 1968 kingorna pisoqarsimaqaaq.
Nanortallip Atuarfia atuartunut 300-nut inissaqarpoq, inini kusanartuni qaamasuni sulisussanngorput aamma atuarfik kantiinaqarpoq arlalippassuarnillu qarasaasiaqarluni.