Tamanut kajumissaarut: Pisinniarfinni ilinniartut inissaannik
Kollegiani inissanik amigaateqarnerup nassataanik pisinniarfinni ilinniartut 25-t taamaatiinnarnissaat annilaanngataavoq, Brugseni aamma Pisiffik annilaarnartumik nalunaarput
Kalaallit Nunaanni Brugseni aamma Pisiffik qaqutigorsuaq isumaqatigiittarnerat ilisimaneqarpoq maannali taakkua marluk ataatsimoorussamik allakkatigut ammasukkut tamanut kajumissaaripput, pisinniarfissuit marluk namminneq naliliinerat naapertorlugu - pisinniarfinni ilinniartunik 25-nik annaasaqariaannaagamik.
Tamanna pissaaq kollegiani pissutsit aaqqinneqanngippata.
Taamak allappoq Kalaallit Nunaanni Brugsenini Tuniniaanermik pisortaq, Carsten Olsen, aamma Pisiffinni Tuniniaanermik pisortaq, Søren Olsen Damgård.
Allagaat ammasaoq tamakkerlugu saqqummiupparput:
"Niuertuulluarneq pingaaruteqarpoq ulluinnarni atugassanik niuerneq ataavassappat. Taamaappoq aamma ilinniartut pillugit oqaatigisassagut.
Ulluinnarni atortussanik niuernermi nuanniitsumik misigisaqarpugut ilinniartutsinnut neqeroorutigisssallugit tulluanngilluinnartumik.
Ilinniartut, niuernermik ilinniarfimmi aallartinnissamik ullunik qulinik sioqqutsillutik saaffiginnikkaangamik tusartinneqartarput, atualernissaminnut ukiumik ataatsimik utaqqisariaqarsinnaasut kollegiani inissat ikippallaarnerat pissutigalugu, tamanna ilinniarnerannik ukiumik ataatsimik sivitsuinermik kinguneqassaaq.
Taamak sullissinermi sullisseriaaseq taanna assut uparuartugassaqqippoq:
- Ilinniartoq nammineerluni atuarfimmut saaffiginnissaaq inissaqarniarneq pillugu paasisaqarusukkuni.
- Ilinniakkamik aallartitsinissaq ukiumik ataatsimik kinguartinneqarsinnaanera pisariaqarsinnaavoq.
- Ilinniartoq ilinniartulluunniit ilinniartuuffia sumilluunniit ilisimatinneqarneq ajorput.
Ulluinnarni atugassanik niuerfinni piffissaq ingerlanerani ilinniartorpassuaqalernikuuvoq, tamakku nunatsinni ilinniarsimasut amerlinissaannut qulakkeerinnittussat. Ilinniartut pitsaanerpaamik atugassaqartikkumallugit suliassanik suliffissanillu pilersaarusiornerit piffissartornarput.
Naammaginanngilluinnartut
Ilinniartut tungaannit aamma ilinniarfiup/suliffeqarfiup tungaanit maanna pissutsit naammagineqanngilluinnarput - paasissutissiineq amigaataasoq aammalu siunissami suliffeqalerumaartussat pikkorissunngortikkiartuaarnerannik sumiginnaaneruvoq.
Ilinniartunik anngaaginnartussiaqarluni taamak ileqqoqarneq akuerineqarsinnaanngilluinnarpoq aamma uagut isumaqarpugut pissusissamisuussasoq naalakkersuisoqarfik sukataarneruppat, ilinniartut annaaginnarnissaasa pinaveersaarnissaat qulakkeerniarlugu.
Pissutsit taamaannerat pissutigalugu ilinniartumik ataatsinnguamilluunniit annaasaqarneq pinngitsoortinneqartariaqarluinnarpoq.
Suliffeqarfinnut saaffiginnittarneq aallartinneqarli taakkua ilinniartut atualernissaannut suut pisariaqarnersut anguneqarnissaannut peqataalerniassapput taamallu iliuuseqarnissamut peqataatinneqarsinnaanerat oqallisigineqalerluni. Ilinniartut piffissaq sioqqullugu paasissutissinneqartarnissaat isumagineqarli. Ilaqutariit najugaqarfiugallarsinnaasut ilanngunneqarlik taamaattut atorfissaqartinneqassagaluarpata.
Kikkut tamarmik soqutigisariaqaraluarpaat inuusuttut ilinniakkamik ingerlatserusuttut pitsaanerpaamik periarfissinneqarnissaat - taakkununnga inuiaqatigiinnullu kalaallinut iluaqqutaasussamik.
Neriuppugut pisortat akisussaasut tamassuminnga isumaqataassasut, Brugsenini aamma Pisiffimmi Tuniniaanermik pisortat naggataatigut oqarpoq.