Ikaartarfik utaqqiisaagallartussaq sivisunaalersoq

Illersornissamut ministerip Nick Hækkerupip Kalaallit Nunaannut ulluni makkunani tikeraarnerani, Illersornissamut ministerip Naalakkersuisullu Kangerlussuarmi ikaartarfimmut atatillugu aaqqiissutaasinnaasunik oqaloqatigiisinnaanissaat Qeqqata Kommuniata neriuutigivaa.

Taama Qeqqata Kommuniata borgmesteria Hermann Berthelsen oqarpoq.

Illersornissamut ministeri ulluni makkunani Kalaallit Nunaanniippoq, silaannaap allanngoriartorneranut atatillugu Kalaallit Nunaanni qallunaat sakkutuuinut atugassarititaasut alakkarterlugit.

-Aasaanerani aattornerujussuup kingunerisaanik Kangerlussuarmi ikaartarfiup aserorsimanerata oqallisiginissaa Qeqqata Kommunia pissusissamisoorsorivaa, Hermann Berthelsen tusagassiuutitigut nalunaarummi allappoq.

Naalakkersuisup Jens B. Frederiksenip borgmesterillu Hermann Berthelsenip isumaqatigiinnerat naapertorlugu, Qeqqata Kommuniata ikaartarfimmik aaqqissutaagallarsinnaasutigut pissusissamisullu aaqqinneqarnissaani periarfissat misissuiffigisimavai.

Læs også "Derfor er forsvarsministeren på besøg"

Læs også "Borgmester: Vi skal være tålmodige"

Sivisunaalersoq
Hermann Berthelsen ilisimatitsivoq aaqqiissutagallarsinnaasutut periarfissatut siunnersuutit assigiinngitsut Qeqqata Kommunia suliamilu teknikkikkut siunnersortigisaasa misissorsimagaat, ajoraluartumilli piffissami qaninnerusumi siunnersuutaasut arlaannaalluunniit piviusunngortinneqarsinnaanngitsoq.

- Tamatumani patsisaanerpaajulluni, Kangerlussuup kujataatungaa erngup supinerujussuatigut tikinneqarsinnaanngimmat, tassangaaniimmi iluarsartuussinissat aallartitassassagaluarmata. Peqatigitillugulu kuup ikaarnissaa ajornarluni erngup qaffasippallaarnerata kinguneranik, nassuiaatitut oqaatigineqarpoq.

Qallunaat ikiuunnissaat pisariaqartoq
Illuatungeriit malillugit qallunaat illersornissami sakkutuuinik ikiorteqarnikkut piffissaq qaninnerusoq isigalugu aaqqiisoqarallarsinnaavoq, tassa nunarsuarmi sumiluunniit taamatut pisoqartillugu misilittagaqartuugamik.

Tamatumunnga atatillugu Naalakkersuisut Illersornissamut minitsereqarfimmut saaffiginninnikuupput, maannamulli kinguneqanngitsumik. Taamaammat Qeqqata Kommuniata massakkut neriuutigivaa, Illersornissamut ministerip tikeraarnerata malitsigisaanik pisumi ilungersunartumi aaqqiissutaasinnaasumik iliuuseqartoqarumaartoq.

- Naalakkersuisut Qeqqata Kommunialu suliami ataavartumik aaqqiissutissamik ujartuillutik suleqatigiipput, naallu illuatungeriit aningaasanut tunngasortaani akisussaaffiup inissinnissaa isumaqatigiissutiginngikkaluaraat, ataavartumik piaartumik aaqqiissuteqarnissamut siunnersortit pilersaarusiaata naammassineqarnissaanut tamanna akornutaasariaqanngilaq, Hermann Berthelsen oqarpoq.

Illersornissamut ministeri Nick Hækkerup sapaatip-akunnerani matumani ataasinngornermiit pingasunngornermut nunatsinniippoq.