Aaqqissuussisut: L.O.C. aamma Nephew eqqartorneqarput
Medina-p tusarnaartitsinissaminik taamaatitsiinnarnerata kingorna aaqqissuussisut neriuutigaat Medina-tut tusaamasaatigisunik pissarsisinnaassallutik
- L.O.C., Nephew aamma Kim Larsen oqaluuserisimavagut. Medinatut tusaamasaatigisunik pissarsiniarsarivugut. Qallunaat nipilersortartuussapput nuannarineqarluartut.
Taamatut oqaluttuarpoq Peter Olsen, Aasianni Nipiaa Rock Festivalimi siulittaasoq Qaasuitsullu Kommuniani aaqqissuussinermut ataqatigiissaarisoq.
Tamanna pivoq Medinap piffissaaleqinini pissutigalugu Nuummi aggustip 31-ianni Aasiannilu arfininngornermi septembarip aallaqqaataani Nipiaa Rock Festivalimi tusarnaartitsinissaminik taamaatitsiinnarnerata aqaguani.
Aaamma atuaruk "Medina taamaatitsimmat nuannarinnittaasa assuaraat"
Aaamma atuaruk "Medina uniinnarpoq"
- Nuummiut (Nipiaa Rock Festivalip siusinnerusukkullu Nuuk Festivalip suleqatigiinnissamik isumaqatigiissutaat, aaqqiss.) peqatigalugit neriuppugut ullumi kingusinnerpaamilluunniit aqagu tusarnaartitsisussamik allamik pissarsisimassalluta, Peter Olsen Sermitsiaq.AG-mut oqaluttuarpoq.
- L.O.C.-mik, Nephew-imik Kim Larsenimilluunniit isumaqatigiissuteqarnissaq qanoq piviusorpalartigaa, tusarnaartitsinissanut qaammat ataasiunngitsorluunniit?
- Piviusorpalaarunanngilaq, neriuppungali Danmarkimit tusaamasamik pissarsisinnaassalluta, tamanna ajornartorujussuussagaluartoq. Oqareernittulli maanna tamanna tamaviaarutigisorujussuuvarput, Peter Olsen erseqqissaavoq.