Australiamiit suliffeqarfiup GME pigilivissavaa
Greenland Minerals and Energy Ltdip suliffeqarfiutertik Greenland Minerals and Energy A/S tamakkiisumik pigilerpaa - Kuannersuarni suliniut qanillallappoq
Suliffeqarfik pappialanik nalilinnik niuerfitsigut nalunaarsugaq Greenland Minerals and Energy Ltd. Australiami Perthimi Australiami najugaqarfilik, Westrip Holding/Rimbal Pty Ltd.-lu maanna piginneqatigiissutit pillugit ukioq ataaseq qaanngiummat illuatungeriit niueqatigiinnerannit nalunaarutaanut tunngasumik tunngavissanut isumaqatigiissuteqarput. Isumaqatigiissut naapertorlugu Greenland Minerals and Energy Ltd.-p Kalaallit Nunaanut nalunaarsorsimasoq Greenland Minerals and Energy A/S tamakkiisumik pigisarilissavaa, siornatigut Westrip aamma Rimbal tassani piginneqatigiissutit 39 procentiinut aqutsisuuvoq.
Australiami pappialanik nalilinnik niuerfimmi oqartussaasunut nalunaarummi Greenland Minerals and Energy Ltd.-mit paasissutissiissutigineqarpoq suliffeqarfimmit piginneqatigiissutit aningaasanngorlugu 5 millioner australske dollarsinik nalilerlugit pisiarigaat ilutigitillugulu suliffeqarfimmit piginneqatigiissutit 67 millionit niuerutigineqarnerani 0,45 australiamiut aningaasaanut piginneqatigiissummut ataatsimut nalilerlugu Westrip aamma Rimbalimut atsioqatigiissutigaat.
Aatsitassarsiornissaq qanilliallappoq
Isumaqatigiissut naapertorlugu Greenland Minerals and energy Ltd.-mit maanna pilersaarusiornermut aningaasaqarnikkullu suleqatigiinnissamut Kuannersuarni aatsitassarsiorniarnermut pisarialimmik pilersitsinissamut suliartik tamakkiisumik aallussinnaanngorpaat, Greenland Minerals and Energy A/S allappoq.
Suliffeqarfimmiit ukiuni kingullerni tallimani annertuumik qillerisoqartoqareersoq laboratoriamilu misissuisoqareernerani uppernarsarneqarsinnaanngorpoq Kuannersuit pinngoqqaatinik qaqutigoortunik imaqartoq nunarsuarmi annertunerpaajusumik uranimik annertuumik zinkimillu akulimmik.
Suliffeqarfimmit naatsorsuutigineqalerpoq misissueqqaarnerit pillugit sulinerup eqqissilluni naammassineqarnissaat, tassunga ilaallutik ingerlatsisinnaassusermik akilersinnaassusermillu misissuineq annertooq, suliaq pineqartoq Kalaallit Nunaanni oqartussanut tunniunneqarnissaa naatsorsuutaavoq 2013-ip aallartisimalaalernerani.
- Ingerlatsisinnaassusermik akilersinnaassusermillu misissuineq aallaavigalugu oqartussat tunngavissaqalissapput kuannersuarni aatsitassarsiorfiliornissamut tunngavissalimmik isummernissaannut. Siunnersuisooqatigiit arlaannaannulluunniit attuumassuteqanngitsut Grontmij aamma Orbicon misissuinernik annertuunik suliaqarnikuupput taamaaliornikkut siunissami aningaasarsiutigalugu aatsitassarsiortoqarsinnaanerani ineriartortitsinissamik patajaatsumik ingerlanneqarsinnaasumik suussusersinissaq.
- Suliaq tamanna Kalaallit Nunaanni soqutigisallit oqartussallu suleqatigilluinnarlugit ingerlanneqarpoq, misissuinerillu paasinarsisippaat Kuannersuit annertuumik aatsitassarsiornermik ingerlatsivigineqalersinnaasoq nunarsuarmi annertunerpaamik akilersinnaanerpaammillu tunisassiorfittalimmik, Greenland Minerals and Energy A/S allappoq.