Mars-robot angusassaminut apuuppoq
Minutsini 7-ni anningaalanganeq Nasamut ajugaaneruvoq: Marsimi angallat Curiosity Marsimut nunnippoq assinillu nassiussilluni
Amerikamiut robotiliaat Marsiliartussaq Curiosity ataasinngormat nunatta kitaata nalunaaqutaa malillugu ullaassakkut 03.32 nunarsuarmut eqqaamiutsinnut isumannaatsumik nunnippoq.
Tamanna pivoq qaammatinit arfineq pingasuni sivisutigisumik novembarip 26-aniit 2011-miillu angalareerluni.
Marsiliartitap Mars-roverimik taaneqartartup Marsip silaannartaani minutsini arfineq marlunni apparsareerluni innermik anitsiffikumiit Galemiit assilisai siulliit nassiutereersimapput. Assimi roverip Marsip qaavani ingerlavii takuneqarsinnaapput angallatip aquaniit assineqarsimallutik, AFR allappoq.
Curiosityp nunninnissaa pissanngatigineqarsimaqaaq. Angallat 900 kilonik oqimaassusilik Marsip silaannartaatigoornermini sukkatsutsi akunnermut 21.000 kilometeriusoq jetmotorit kigaallasaatillu atorlugit 0-imut pisippaa.
Læs også "Nasa-køretøj lander på Mars mandag morgen"
USA-p præsidentiata Barack Obamap nunarsuarmut aappaluttumut nunninnerup iluatsinnera unnersiutigaa.
- Curiosityp laboratoriaasup ingerlaartup nutaaliaanerpaap nunarsuarmut allanut nunneqqaartup iluatsittumik nunninnera teknologimi angusat maannamut annersaraat, tassaalissaarlu qaqugorsuarmut nunatsinni angusatut angisuutut inissisimasussaq, oqarpoq.
Marsimi angallat arfinilinnik assakaasulik 15 milliarder koruuninik akeqarsimasoq ukiuni marlunni nunarsuaq aappalaartoq misissussavaa uumassuseqartoqarneralu paasiniarlugu.
Ilisimatuut uumassusilinnik nassaarnissartik naatsorsuutiginngilaat, neriuutigaalli Curiositymi atortorissaarutit atorlugit pujoralaap qaarsullu misissoqqissaarnissaa Marsimi uumassuseqartoqartarsimanera misissorlugu.
Nasap Marsiliarnermi siuttuata Doug McCuistionip suliaq 'aalajangiisussatut' nalilerpaa uagut nunarsuarmiut avataarsuani kisiartaanersugut paasiniaanermi, kiisalu Marsip masattumiit panertunngorsimanera sumik peqquteqarnersoq paasiniarlugu.
- Iluatsitsissagutta tamanna avataarsuani nunanik allaasinnaasunik misissuinermi angusaassaaq aatsaat taama annertutigisoq, oqarpoq.
Københavnip ilisimatusarfiani Niels Bohr Institutetimi ilisimatuut Morten Bo Madsenimit siulersorneqarlutik suliami peqataapput. Marsimit nassiussat misissortartussaavaat.