Nasa-p angallatiliaa ataasinngornermi Marsimut missaaq
Marsimut pissanganartumik mittoqarnissaa naatsorsuutigineqarpoq angallat 900 kiilunik oqimaassusillip ornitani tikippagu
Ataasinngornermi ullaakkut danskit nalunaaqutaat naapertorlugu 07.31, Nasa-roboti "Curiosity" tonsimik oqimaassusilik Marsimut nunnissaaq - pilersaarutit tamarmik ajunngitsumik ingerlassappata. Mars-roverimik taaguusigaq silaannarsuarmi qaammatini arfineq-pingasunit amerlanernit angalaareerpoq. Ukiut marluk tulliuttut ulloriarsuarmi angalasumi angallat ingerlaartinneqassaaq misissuissalluni arlaatigut uummassusilimmik marsimiittoqarsimaneranik paasiniaalluni.
Niels Bohr Institut, Københavns Universitetimut atasoq, toqqaannartumik "Curiosity"-mit ulloriarsuup angalasup sanilerisatta misissuiffigineqarnera peqataaffigineqarpoq. Unammilligassat annerpaartaraat minnissaq, Nasa-ingeniør Tom Rivellini oqarpoq.
- Minutsit arfineq-marluk piffissaraagut Marsip silaannaani qatsinnermit marsimut minnissatsinnut, sukkassusermit nal. akunneranut 13.000 miles-init (21.000 km. missaannit) 0-inut pisariaqarpugut. Sunaluunniit ataasinnguaq pissusissamisut ingerlanngippat iluatsitsinngitsuussaagut, Rivellini oqaluttuarpoq.
"Curiosity" ("Alapernaatsoq") ilisimatuut laboratoriaraat ingerlasinnaasoq tupinnaannartumik piginnaanilik. Angallat arfinilinnik assakaasulik plutonium-isotop pilersitaannit kissartumik ikummateqarpoq. 15 milliarder koruunit missaannik akeqarluni.
Angallat robotimik taliusaqarpoq, qilleruteqarluni, ilisimatuussutsikkut atortorissaarutit qulit pigalugit, ilaatigut marlunnik videoliuuteqarluni, ujaqqanik soqutiginartunik killuisinnaalluni laserimik qinngornerit atorlugit, kiisalu nassaanik suussusersiniaatitaqarluni, taamaasilluni nassaat pillugit paasissutissat Nunarsuarmut nassiunneqarsinnaasallutik.
Niels Bohr Institutetimi doktorinngorniap Kjartan Kinch, "Curiosity" paasissutissat nassiussugai suussusersiniarnerinut peqataassaaq. Danskit Marsimik ilisimatusartortaannut pingaarnerpaajuvoq ulloriarsuup angalasup qaavanit pujoralaat nunamilu pujoralaaqqat suussusersinissaat paasissallugit.
- Ilisimatuussutsikkut apeqqut annertooq suliaraarput: Silaannarsuarmi uumasoqarneq qanoq siammarsimatigiva? Nunarsuatsinni taamaallaat uumasoqarpa imaluunniit allani aamma uumasoqarpoq? Takorloorneqarsinnaavoq Marsimi ima atugassaqartoq uumassusilinnik pinngortoqarsinnaalluni, Kjartan Kinch oqarpoq.
Tycho Brahe Planetariumimi Københavnimiittumi nunninnissaq toqqaannartumik ullaarnganiit malinnaaffigineqassaaq.