Meeqqat eqqumiitsulianik saqqummersitsisut
Aalajangersimasunik suliassaqarsimapput - aamma meeqqat assassorumatuut aasaanerani pikkorissartinneqaramik pinnguarsinnaatitaapput. Maanna suliaat Katuami saqqummersinneqarput
Aviaaja Hammekenip aggustip arfernganni meeqqat-inuusuttuaqqat saqqummersitsinerat ammassavaa, meeqqat aasaanerani eqqumiitsuliornermik pikkorissartinneqarnerisa inerneraat, Aviaajap ilinniartitsisutut ingerlatsivigisimasaa.
Tamanna Nuummi Katuami pissaaq.
Takuneqarsinnaasussat tassaapput meeqqat inuusuttuaqqallu arfineq-marlunniit 22-nik ukiullit suliaat. Ilusilersugaapput titartagaallutik - kisianni aamma mersukkanik ilaqarput.
Meeqqat sapaatip akunnera aamma sapaatip akunneri marluk pikkorissarsimapput, ilaatigut kalaallisuut qanimut misissorneqarsimallutik.
Saqqummersitsineq 2012-imi aggustip arfernganiit 16-iat ilanngullugu ingerlassaaq.
Aviaaja Hammeken ilaatigut Holte Textil skolemi aamma Fashion Design Akademimi ilinniarsimavoq taanna ilusilersuinermik atuarfik namminersortunit ingerlanneqarpoq. Kingorna Odense Fagskolemi annoraaminilerineq ingerlappaa. Aviaaja ilaatigut Tivolimi 2003 aamma 2006 atisaliaminik nutaanik takutitseqataanikuuvoq.