Martin Møller – ajugaalluavippoq
Nuuk Marathon ingerlanneqarnerani Martin Møller pisassaanngilaq - kusanarluinnartumik ajugaavoq
Ullaap tungaani sialuk Nuuk Marathonip ingerlanneqarnerani eqqissiivilluni koorusaarpoq. Peqataasut arlalippaaluupput kisianni amerlagisassaagatik.
Stig Brahe Sørensen, siornatigut Nuuk Marathonimik ajugaareersimasoq tamatumuuna maratonip affaanik arpappoq ajugaaffigisaminik, atorlugit 1.17 tiimit. Apuutereermat Martin Mølleritulli marloriaammik arpassamaartut amerlanngillat.
Martin Møller kisimiilluni arpaffik tamakkerlugu ingerlaarpoq. Unammillerteqarani apuulluni, atorlugit 2.46,13 tiimit. Piffissaq kusanaq ilami ukioq manna siusinnerusukkut arpakkami minutsinik marlunnik sukkaneruinnarpoq.
- Arpanneq eqqumiilaarpoq. Arpaffimmi kisimiilluinnartutut misigisimavunga, pingaartumik Stig Brahe Sørensen maratonip affaanik taamaallaat arpattup apuutereernerata kingorna, Martin Møller Sermitsiaq.AG-mut oqarpoq.
- Allaanngilaq »Palle silarsuarmi kisimiittutut« piffissap annersaani arpalluni. Siuninni tununnilu arpattunik allanik takusassaqanngilaq. Piffissami massumani timigissaarpunga arpannera aqulluarsinnaallugu. Piffissaq atugara 2.46,13 ajunngilaq, siornarnit minutsinik marlunnik kigaanneruvunga, kisianni taamani aamma unammisaqarpunga. Nammineq rekordinnit minutsinik tallimanik kigaanneruvunga, taamaattumik formigissorujussuuvunga, Martin Møller nuannaaqisoq oqarpoq.
Kingusinnerusukkut arpannermit inernerit assillu ivertikkumaarpagut.