Nerisassanik amigaateqarnermi akerliulluni atsiortitsisoqarpoq
Ullup ataatsip ingerlanerani Illoqqortoormiuni inuit 157 atsiorput Pilersuisumi nioqqutissanik amigaateqarnermut akerliullutik
- Pilersuisup taamatut pilersuinera maani innuttaasugut naammagiinnarsinnaajunnaarparput, ukiummi tamaasa Pilersuisup sungiutiinnaarsimagunarpaa Ittoqqortoormiini innuttaasunik sumiginnaasarnini. Innuttaasutulli allatut pilersorneqartarnissarput kissaatigaarput.
- Nioqqutissanik inuuniarnermut pingaaruteqartunik nunguuterujussuaqqinnginnissaq siunertaralugu matumuuna Ittoqqortoormiini innuttaasugut atsiortiterpugut, tujorminaqimmat taama avinngarussimatigisumiilluni nunguuterujussartarneq ukiut tamaasa misigisartagarput pillugu. Avinngarussimasumiikkaluarlutami inuuvugut, inooqataasutulli allatut pineqartariaqarluta.
Ilaatigut Illoqqortoormiuni innuttaasut 157 atsiorsimasaani taamatut allassimasoqarpoq.
Tamanna pivoq piffissami kingullermi annertuumik ajornartorsiornerup kingunerisaanik, Pilersuisoq ulluinnarni nioqqutissanik soorlu iffianik, qajuusanik qallersuutinillu amigaateqarmat.
Læs også "Endelig mad til Tunu"
Læs også "Østgrønlændere skriger efter mad"
Ane Sofie Hammeken aamma Adda Madsen atsiortitsisuupput, ilaatigullu ima allassimasoqarpoq:
- Naatsiiat panertorpassuit mamakujuttorpassuillu pisiniarfiup ilisiviini amerlaqaat, taakkua inuussutissanut pingaaruteqartunut inangiisuusinnaanngillat, tamanna inuup kialuunniit eqqarsalaarsinnaasup erngerluni takusinnaavaa, nioqqutissanik piniartarnermi equngasoqartoq. Umiarsuummi siulliup tikinnissaa qaammatini sisamat tallimanik sioqqullugu nioqqutissanik nunguutsisarneq aallartittarmat.
- Tamatumalu kingunerisarpaa Islandimiit nioqqutissanik timmisartukkut tikisitsisarneq, nioqqutissat akisoorsuit, allatulli ajornartumik pisiarisariaqartakkavut.
Umiarsuaq pilersuisoq pilersaarutit malillugit aggustip 8-ni tikissaaq.