Ukiuni 40-ni pisortani sulivoq
Københavnimi nunatta aallartitaqarfiani paasissutissiinermik suliaqartoq Susan Frydendal aggustip aallaqqaataani 2012-mi ukiuni 40-ni pisortani suliaqarsimanerminut nalliuttorsiussaaq
Tivolimi inuppassuit tusindilikkaat nuannattut ilagaat Susan Frydendal.
Ullumikkut aggustip aallaqqaataani pisortani sulinermini ukiunik 40-nngortorsiorluni nalliuttorsiorpoq.
Nunatta aallartitaqarfiani pingasunngorpat iliasseqargiinnermi ilaquttat, attavigisat suleqatillu ukiuni 40-nik malunnartitsinermi peqataassapput.
Aaqqissuisoqarfimmi nunatta aallartitaqarfiani Susan Frydendal pillugu imaattumik tigusaqarpugut:
”Susan Frydendal aggustip aallaqqaataani 1972-mi taamanikkut 17-inik ukioqarluni Ministeriet For Grønlandiusimasumi allaffimmi ilinniartutut aallartippoq, ilinniartooreerlunilu februaarip 1-ani 1975-mi allaffimmiutut atorfinivilluni.
Susan 1983-imiilli nunatsinnut, siullermik namminersornerullutik oqartussanut kingornalu 2009-mi namminersorlutik oqartussanut atorfilittatut sulivoq. Allattaanertut sulinera paasissutissiisarnermik kulturikkullu suliassanit taarserneqariartorsimavoq, 1980-ikkunni puisit amiisa atorneqarnissaannik paasisitsiniaaneruppat, nunatsinnit tunisassianik ussassaarineruppat, nunatta takornariarfissaqqinnera pineqarpat imaluunniit Folketingimut ilaasortarpassuarnut tusagassiortunullu ingiallortitut angalaneruppat.
Susan Frydendalip attaveqarluarneratigut nunatsinnillu ilisimasaqarluarneratigut ilaatigut »Kalaallit Nunaat Danmarkimisut« taaneqartartoq paasiniaaffigissallugit itigarfiunngisaannarpoq. Tamassuma saniatigut nunatsinni Danmarkimilu naalakkersuinermik sulinermit naliliisinnaassuseqarluartuuvoq; taamatut piginnaasaqarnermigut Danmarkimi tugasassiuutit alaatsinaattarpai, taamaalilluni Danmarkimi pisut Nuummiit malinnaavigineqarsinnaallutik naak akunnernik sisamanik nikinganeqaraluartoq.
Nunatta aallartitaqarfiani paasissutissiinermik suliaqarnermi saniatigut Susan Frydendal aaqqissuussillaqqinnermigut allattaanertut suliassarpassuit iperarnissaannut akuerineqarsimanngilaq, taamaalilluni suli nunatta aallartitaqarfiata saaffiginnittarfiani sulilluni”.