Tunumi nerisassameertut
Illoqqortoormiuni innuttaasut nioqqutissanik ulluinnarsiutinik soorlu iffianik, iffiaq-qaqortunik, qajuusanik qallersuutinillu amigaateqarput. Umiarsuaq pajuttoq aggustip arfineq-pingajuani tikissaaq
Illoqqortoormiuni Pilersuisup pisiniarfiani ilisiviit imaqanngingajalluinnarput. Iffiat, iffiat-qaqortut, qajuusat qallersuutillu nungupput - nioqqutissallu ulluinnarsiutit ikittuararsuit sinnerussimallutik.
Aatsaat aggustip arfineq-pingajuani umiarsuarmik pajuttumik tikittoqarnissaa illoqarfimmi innuttaasut ilimagisinnaagaat, KNR paasissutissiivoq.
Pisiniarfiit nioqqutissanik nunguutsilertornerusalernerannut Tunumi takornariaqarnerulernera pissutaaqataavoq. Taamaattumik maannakkorpiaq pisariaqartitsineq matussuserniarlugu timmisartumik attartornissaq isumaliutigineqarsimavoq. Tamannali piviusunngussagunanngilaq.
- Nioqqutissat timmisartukkut tikisitat assersuutigalugu Illoqqortoormiunut tikisinneqartut Kitaani nioqqutissanit ulluinnarsiutinit akisunerungaatsiartarmata timmisartumik attartorutta tamanna akinik suli qaffasinnerusunik kinguneqarsinnaavoq, Pilersuisup pisortaa Frederik Olsen KNR-imut oqarpoq.