Kina avataarsualiartaammik inuttaqanngitsumik aappaagu qaammammuliartitsissaaq

Kina aappaagu avataarsualiartaammik inuttaqanngitsumik qaammammuliartitsissaaq Kinamiut siullersaanik qaammammuliartitsinissamut piareersaatitut

Kinap præsidentia Hu Jintao soqutigiarpassuaqarpoq, Maannakkut Issittup nunatsinniit isiginissaa pineqanngilaq. Arkivfoto: Zuma Press

Kina aappaaguinnaq avataarsualiartaammik inuttaqanngitsumik qaammammuliartitsissaaq qaammatip misissornissaanut avataarsualiarnissamik pilersaarummi annertuumi aallarniutitut. Pilersaarutaavoq Kinamiunit siullersaasumik qaammamuliartitsinissaq.

Aatsaat siullermeertumik Kinamiit qaammammut avataarsualiartaammik mittoqassaaq.

- Kina avataarsualiarnissamik pilersaarusiorusuppoq, nunarsuarmi pitsaanerpaat ilaattut nalilerneqartussamik, avataarsualiartarnermik misissueqqissaartartoq arlaannaannulluunniit attumassuteqanngitsoq Morris Jones oqarpoq.

- Nunarsuarmi avataarsualiarnermi siuttoorusukkaanni taamaattumik suliniuteqartariaqarputit, nangippoq.

Taamatut pilersaaruteqaqqaarnermikkut Kinamiit qaammammut mittoqassaaq, tamannalu avataarsualiarnermut atatillugu angusaqarnermut malunniutaassaaq, tasanilu anguniagaavoq qaammatip kaaviiaarnissaa, miffiginissaa qaammammillu uternissaq, Kinamiut nutaarsiassaqartitsiviat Xinhua allappoq.

Læs også "Flag på månen forsvundet"

Kinap nunarsuarmioqatigiinni sunniuteqarnerujartorneranut teknikkikkullu ilisimasatigut siuttuuleriartorneranut takussutissatut Beijingimit isigineqarpoq.

Kingullermik ulluni 13-ini aatsaat siullermeertumik Kinamiit avataarsuanut taama isorartutigisumut angalasoqarpoq juunimi avataarsualiartaat Shenzhou 9 atorlugu. Suliniutip taassuma aamma tusaamaneqaatigaa aatsaat siullermeertumik arnamik avataarsualiartartumik Kinameersumik ilaasoqarami.

Aappaagu suliniummi 2007-mi Chang'e 1 aamma 2010-mi Chang'e 2 ingerlateqqinneqassapput. Taakku marluk Kinami qaammatip guutiata arnap aqqanik taaguuteqarput.

Kina pilersaarutaat piviusorpalaarput, avataarsualiartarnermik misissueqqissaartartoq arlaannaannulluunniit attuumassuteqanngitsoq Chen Lan oqarpoq.

- Pilersaarutit Kinap piginnaasaasa missingersuusiaasalu iluaniipput, oqarpoq.

Taamaattorli suli teknikkikkut siuariartornissaq amigaataavoq, Kinap pilersaarutini naammassisinnaassappagit, tassani qaammammut mittoqarluni utimullu ingerlasoqarluni, oqarpoq.

Kinami avataarsualiortartup siullermeertumik qaammammut tullarnera tassaassaaq 1972-miilli amerikamiut kingulliit qaammammut tullarneranniit tullarneq siullerpaaq. Chenili isumaqanngilaq, tamanna siunissami qanittumi Kinamiit anguniagaasoq.

- Teknikkikkut aalajangiinerunani naalakkersuinikkut aalajangiineruvoq, oqarpoq.

Powered by Labrador CMS