Atisanik takutitsinissami piniartuuneq nersorniarneqartoq

Piniartut inooriaasiat "Grønland i Tivoli" ulluni tulliuttuni ingerlanneqalerpat nersorniarneqassaaq

Nauja Lynge ukioq manna "Grønland i Tivoli" ingerlanneqarnerani atisanik nutaalianik takutitsinermi peqataassaaq. Assi toqqorsivimmit.

Marlunngornermi pingasunngornermilu "Grønland i Tivoli" ingerlanneqarnerani peqataasut kalaallit piniartutut kulturiat pinngortitarlu nersorniarneqassapput.

Ukioq manna atisanik nutaalianik takutitsineq Nauja Lynge, Isaksen Design aamma Great Greenlandimit aaqqissuunneqartoq, atortussat pinngortitameersut piniartullu pisaanneersut aallaavigalugit takutitsinerussaaq.

Nauja Lyngep atisat qeqqussanit suliat takutitarissavai - taamaaliornermigut pissutissaqarluarluni ilusilersuisartoq oqarpoq:

- Takutitsinissaq tamarmi pinngortitamut aamma qangaaniilli piniartutut inooriaatsimik nersorinninneruvoq, taanna kalaallit anersaavanni inissisimalluartoq tamatta ilinniarfigisinnaaqisarput. Tunisassiorneq aallaavigalugu inooriaatsitsinni paasiartuaaqqilerparput qangaanerusoq inooriaatsip isumatunera, sullu tamarmik imminnut ataqatigiinnerat alutoralutigu tassani imminut napatissinnaanermik isuma atorneqarmat, Nauja Lynge oqarpoq nangillunilu:

- Kalaallit Nunaannut asanninnerput nunarsuarmiut paasitikkusupparput sumiiffimmit misigissutsit assillu takutinnerisigut, suut tamarmik mamarnerusutut misigineqarsinnaanerat, isikkorinnerusinnaanerat aammalu qangarsuarneersunik peqarnera. Tamakku tamarmik Kalaallit Nunaannik immikkuullaritsitsisut, misigissutsit qangarsuaanit piusut, nuannaarneq, qullilineq taavalu asasinnaasatsinnut pigilersinnaanngisatsinnulli attuumassuteqarnerput. Silarsuarmut igalaaq ammarparput erlinnartuutivut saqqummiukkumallugit.

- Mutiliornikkut Kalaallit Nunaat ersersinniarparput tamaani qeqquaqarpoq, puisip amiinik, aalisakkat amiinik aammalu immikkuullarilluinnartumik oqaluttuassartaqarluni, taakkua atisanik nutaalianik takutitsinikkut ersersinniarpagut.

Atisanik nutaalianik takutitsinissaq Tivolimi Pantimineteaterimi marlunngorneq nal. 16.00 aamma 18.30 ingerlanneqassaaq. Pingasunngornermi atisanik takutitsineq nal. 19.00 sumiiffimmi eqqaariikkami ingerlassaaq. Atisanik nutaalianik takutitsineq akunnerit marluk affaanik sivisussuseqassaaq.

Powered by Labrador CMS