Pisiniarfeqarfik taallanik nutaanik nioqqutilik

Nunatsinni eqqumiitsuliortut nersualaarneqarnerpaartaasa tamatigoornerpaartaasalu ilaata taalliai katersat Nuuk Center tallimanngornermi juulip 27-ani ammarpat neqeroorutit pisinianit pisiarineqarsinnaasussat akornanniissapput.

Taalliortup, qalipaasup nipilersortartullu Frederik »Kunngi« Kristensenip taalliani katersat »Soqutiginartut – Nunamut avatangiisimullu tungasut« naqiterisitsisarfik Atuagkat, centerimi init quleriit siullersaanni allaffimmik nutaamik ammaasoq, aqqutigalugu saqqummersippai.

Læs også "Nuuk Center sekunder fra åbning"

Atuagaq 146-nik qupperneqartoq 198 koruuninillu akeqartoq taallanik 82-inik imaqarpoq, atuakkap qulequtaani ersersinneqartutut nunamut avatangiisinullu tunngasunik soqutiginartunik.

Centerimi naqiterisitsisarfiup allaffiani Frederik »Kunngi« Kristensen taalliaminik nal. 14.00-miit atuffassissaaq, atuagarlu tusarnaarianit eqqumiitsuliortumut tamatigoortumut atuakkap saqqaanik kusanartumik soorunami aamma suliarinnissimasumut atsiortinneqarsinnaavoq.

Tamatuma peqatigisaanik naqiterisitsisarfik Atuagkat Frederik Kristensenip qalipagaanik nutaanernik Nuuk Centerimi allaffittaamini saqqummersitsissaaq.

Atuakkamik qalipakkanillu saqqummersitsineq pissaaq Frederik Kristensenip 60-iliilluni inuuissiorneranit sapaatip-akunnerata ataatsip qaangiunnerani.

Frederik IX-ata aamma dronning Ingridip nunarput siullerpaamik 1952-imi aasakkut tikeraarpaat, tikeraarnermullu eqqaassutissamik Nuummi Nuutoqqami nappaasoqarsimavoq.

Taamaalilluni kong Frederiup Uummannami napparsimmavimmi nukappiaqqamik inoorlaamik tigummiarneranit aamma ukiut 60-it qaangiupput.

Nukappiaraq soorunami Frederimmik ateqalerpoq Kristensenimillu kinguliaqalerluni, amerlanernilli taalliortutut, qalipaasutut nipilersortartutullu Kunngisut ilisimaneqarpoq.

Eqqaamasalersaarutit piumaneqarluartut
– Kalaallit Nunaanni naqiterisitsisarfimmik pisariaqartitsisoqarpa?

– Atuakkanik saqqummersitsiniarneq ajornaannerulersimanngilaq, kisianni atuakkianik kalaallisuunik sulianut oqaluttualianullu tunngasunik ingerlatitseqqiisassagaanni naqiterisitsisarfimmik suli pisariaqartitsisoqarpoq, naqiterisitsisarfiup pisortaa Inger Hauge Nuuk Ugeavisimut oqarpoq.

– Atuagkat piffissami matumani sunik saqqummersitsisarpa?

– Taallianik katersanik ukiorpassuarni saqqumersitsisoqartareersoq eqqaamasalersaarutinik allanneq maanna pimoorunneqalerpoq, Inger Hauge oqaluttuarpoq.

Finn Lyngep atuakkiaa »Et langt liv på tværs. 1933-79« ungasinngitsukkut malitseqassaaq. Kalaallisut eqqaamasalersaarutit maanna aamma qallunaatut saqqummersinneqartalerput, soorlu Folketingimut Inatsisartunullu ilaasortaasimasup Otto Steenholdtip atuakkiaa »Strejflys over mit liv« aamma assilialiortartup Lisa Lynge Hesseldahlip atuakkiaa »Hvad jeg husker fra min barndom«.

Marie Skouip ataatani, taalliortoq erinniortorlu Pavia Petersen (1904-43) pillugu atuakkiaa novembarimi saqqummersinneqassaaq. Atuakkap ungaluani kaasarfiusamiissaaq CD erinnanik qulinik Aasianni erinarsoqatigiinnit immiunneqarsimasunik imalik.

–Sooq eqqaamasalersaarutit ukiuni makkunanerpiaq?

– Inuit sorsunnersuup kingulliup kingorna allanngornersuarmi pingaarutilimmik suliaqasimasut eqqaamasalersaarutiminnik allannissamut kiisami maanna piffissaqalersimagunarmata, aamma nalitsinni unammilligassanut angisuunut tunngavissat atuarneqarnissaat soqutigineqarmata, Inger Hauge oqarpoq.

Nunaqarfinni suli meeraqarlunilu inuusuttuaraqarpoq, taakkuali Cyberspace sungiutereersimavaat, 75-inillu ukiullip Otto Steenholdtip Qeqertarsuatsiami nunaqarfimmi meeraanilersaarutaa qangaanerulaartoq inuppassuarnit angajoqqaanit aanaakkunnillu oqaluttuarsiarineqarsimasoq pillugu eqqarsaatinik pilersitsivoq.

– Naqiterisitsisarfimmi maannakkorpiaq tunisaanerpaaq sunaava?

– Paffequtit atugaaqqilersimagunarput, Aviaaja Kleist Burkalimmi atuakkiaa »Paffequtit« nungoqqajaavoq, Inger Hauge oqaluttuarpoq.