Siumut: Umiatsiaararsortut ikiorneqarlik massakkorluinnaq

Aalisarnermut, Piniarnermut Nunalerinermullu naalakkersuisoqarfik aamma Kalaallit Nunaanni Aalisarsinnaanermut Akuersissutinik Nakkutilliisoqarfik sisamanngormat nalunaarput, aqutsiveqarfimmi Qeqertarsuup Tunuani sinerissap qanittuani umiatsiaararsorluni qaleralinniat aqagu arfininngornermi naggataamik tunisissasut.

Tamanna ilaatigut Halibut Greenlandip aalisakkanik suliffissuani Ilulissaniittumi aalisakkerivimmi sulisartut affaasa allamik suliffissarsiortariaqalernerannik isumaqartoq pisortaq Niels Thomsen KNR-imut oqarpoq.

Halibut Greenlandimi sulisartut 30-t sinnillit saniatigut Ilulissani umiatsiaararsortut 235-t allamik aningaasarsiorfissarsiortariaqassapput.

Siumup siulittaasua Aleqa Hammond oqallisissiami matumani pingaarnersiorlugu ilanngussatsinni allappoq umiatsiaararsortut toqqissisimajunnaartut. Umiatsiaararsortullu atugaat inuiaqatigiit sinnerinut siaruaatissasoq:

"Naalakkersuisooqatigiit maannamut aalisarnermut politikkiata takutippaa aalisartut aammalu aalisarnermik inuussutissarsiuteqartut umiatsiaararsortut aammalu angallataatillit pisassaasa appasippallaarnerata kingunerisaanik aalisarnerup inuussutissarsiutitut taaneqarsinnaaneranut amerlasuut apeqqusiisut aammalu amerlasuut ingerlariaqqiffissaaruttutut misigisimasut.

Atugassarititaasut pitsaanerit

Siumut isumaqarpoq allannguisoqassatillugu allannguinissaq pitsaasumut inuiaqatigiinnut inuussutissarsiuteqartunullu iluaqutissanngorlugu allannguisoqartassasoq. Maannamut pisassiinermut tunngatillugu paggatassiineq isumatusaanngitsumik aaqqiineroq nassuerutigineqartariaqartoq isumaqarpugut, siunnersuutigalugulu pisassanik agguaasseriaaseq nutaamik piaartumik nalilersuiffigineqassasoq aammalu qulakkeerniarneqassasoq maannamut aporfiulersut qaangerniarlugit iliusissat aallarnisartariaqartut.

Siumup siunnersuutigaa pisassiisarnermut innersuussuteqartoqartinnagugu atuisut kattuffillu qanimut siunnersortitut pituttortumik suleqatigineqartariaqartoq, taamaasilluni illuatungeriit inerniliussassami isumaat ataqqineqarluinnarlutik siunnerfeqatigiittumillu pisassiisoqartariaqarnera isumaqaratta.

Siumumi isumaqarpugut aalisartut ukiup sinneranut pisassaaruttut socialimut innersuutiinnarnissaannik siunnerfeqarneq aalisarnermut politikkip atorsinnaanngilluinnartuuneranik oqariartuuteqartuusoq namminerisamik.

Pisassat aporfiutillugit aalisarfiillu annertusiartortinnagit aammalu pisassanik innersuussisartut eqqoriaanerinnangajammik toqqammaveqartumik innersuussisartillugit pisussaavugut aalisarfiit amerlanerit nassaariniarnerini nukiit tamaasa atorlugit sulissalluta aammalu aningaasaliiffigissallugit, taakkuummatami qulakkeerinnittussat siunissamut imminut napatissinnaasumik aalisagaqartassiisarnissamut qulakkeerinnittussat aammalu pisassaqartitsissasut.

Upperaarput qularinagulu imartatsinni aalisarfiit amerlanerusut nassaarineqarnerisigut aamma pisassaqassutsimut iluaqutaallunilu ilisimasavut amerlineqassasut.

Siumut suleqataavoq suleqataajumallunilu maannmut atukkat, tassalu umiatsiaararsortut suliffissaaleqisut allattorsimaffiannut ilanngutitsiinnarnissaat pinngitsoortinniarlugu, naalakkersuisut inuiaqatigiinnut isiginneriaaseq paasinniffiusoq atorlugu naakkinnittumik aammalu naaperiuteqarfiusumik suleriuseqarlutik ukiup sinneranimut erseqqissumik politikkeqartoqarnissaannik takutitsiniarsuaassasut, ilami socialimut innersuussinnaanernissaq politikkiunngimmat.

Naalakkersuisut tusaaniartariaqarput

Qisuariaatit amerlaqaat kisianni ersersippaa aalisartut toqqissisimannginnerat, tusaaneqartutut misigisimannginnerat aammalu naapertuilluanngitsumik pineqarsorinngitsut amerlaqisut. Naalakkersuisut tamanna tusaaneqarluni piaartumik iliuseqarfigineqartariaqarpoq.

Siumup qisuariaatit tusaallugit paasillugillu suliniutit ingerlappai ukiamullu inatsisartut ataatsimiinnissaannut atatillugit aalisartut illersorlugit aaqqissutissanik tigussaasunik siunnersuusiorpoq, periarfissikkumallugit inuussutigineqarsinnaasumik inuussutissarsiorsinnnaasut imminut pilersorsinnaqqullugit", Aleqa Hammond ilaatigut allappoq.