Danskit ilisimatuut Qalasersualialersut
Sapaatip akunnerani aggersumi danskit naalagaaffeqatigiiffiata Qalasersuup imartaanik naalagaaffiup killeqarfiata iluani piginnittussaanermut aqqummi alloriarneq tigoqqissavaa
Marlunngornermi svenskit sikunik aserorterutaa "Oden", Svalbardimi Longyearbyenimit avannamut aallassaaq. Aserorterummi issimasuussapput danskit svenskillu ilisimatuui. Danskit ilisimatuut suliassaat erseqqippoq: Taakkua paasissutissat katersussavaat, uppernarsaasinnaasut Danmarkip aamma Kalaallit Nunaata imartamik Qalasersuup eqqaaniittumik inatsisitigut piginnittussaanerannik.
Danmarkip, Savalimmiut aamma Kalaallit Nunaat peqatigalugit Atlantikup avannaani aamma Issittup imarpissuani sumiiffiit tallimat killeqarfimmik iluaniittussatut FN-imut piumasaqaatigereerpaa. Naalagaaffeqatigiit oqaatigaat Kalaallit Nunaata nunataata tunngavia Qalasersuaq 380 sømil tikillugu ingerlaartoq, taamaattumillu taanna danskit naalagaaffiannut atasariaqartoq, piumasaqaammi allassimavoq.
- Kalaallit Nunaata avannaani paasissutissanik suli amigaateqarpugut, taakkua danskit jsumiiffimmik piumasaqarsinnaanerannut amigaataapput, ilisimatusaqatigiinnik aqutsisoq siunnersortaaneq Christian Marcussen, GEUS (De Nationale Geologiske Undersøgelser for Danmark og Grønland) oqarpoq.
Danmarki ilaatigut Rusland, Norge aamma Canada peqatigalugit nunarsuarmi imarpiit avannarpasinnersaannik pilernguteqataavoq, neriuutigineqarmat sumiiffimmi ilisimatusarnermi aatsitassanik nalitoorsuarnik nassaartoqarsinnaanera.
Naalagaaffeqatigiinni 2014 tungaanut suliamik naammassinninnissamut piffissaqarput. Paasissutissat Kalaallit Nunaata avannaanit aamma avannaata-kitaaneersut suli FN-ip ataani Komitéen for Kontinentalsoklens Grænser (CLCS) tunniunneqanngillat.