Umiarsuaq akimasoorsuaq Kalaallit Nunaannut tikissaaq

Nunarsuarmi umiarsuit takornariartaatinit kajumerineqarnerpaaq M/S Europa Kalaallit Nunaat toraarlugu ingerlaarpoq

Qatsunganersuarmi. MS Europa umiarsuarnit takornariartaatinit Berlitz-imi nalilersorluarneqarnerpaajuvoq. Assi: MS Europa akimassuseq kusanassuserlu sapinngisaq tamaat anguniarneqarsimavoq. Taanna sapaammi Nunatsinnut pissaaq. MS Europami neriartarfiit taamak isikkoqarput. MS Europa - nanoqklassimut assersuunneqarsinnaavoq.

Tyskit umiarsuaat takornariartaat MS Europa, Torshavnimit Prins Christian Sund aqqusaarlugu ingerlareernermi kingorna sapaammi juulip 29-anni Aappilattup avataani kisarnissaa naatsorsuutigineqarpoq. Umiarsuaq taanna immikkuullarilluinnartoq nunaqarfimmit tikinneqassaaq. MS Europa nunarsuarmi umiarsuarnit tamanit Berlitz-ip, atuagassiaq umiarsuarnik takornariartartut malikkumasartagaat naapertorlugu qaffasinnerpaamut inissinneqarsimavoq.

- MS Europa umiarsuaavoq akimasoorsuaq, umiarsuarmi taamaallaat suitit (inersuit) najugaqarfigineqarsinnaapput. Init "ineeqqanik" taanissaat eqqunngilaq. Qujanartumilli umiarsuaq piginnittaalu tyskiusut Kalaallit Nunaannik nuannarinnittuupput aatsaallu perngaamik nunatsinnut pilinngilaq, Visit Greenlandimi siunnersortaanerusoq Malik Mildfeldt oqaluttuarpoq.

- Taamaattoq siornatigut takusartakkatsinnut naleqqiullugu ukioq manna nunaqarfiit illoqarfiillu amerlanerit tikissavaa, tamanna soorunami nuannaarutigeqaarput takornariarfissatummi tunniussassaqarluarpugut, Malik Milfeldt oqarpoq.

Umiarsuarmut takornariartaammut ilaasut Aappilattunut tikippata kalattoortartunit tikilluaqquneqassapput, kingusinnerusukkut erinarsoqatigiit oqaluffimmi tussiaqattaassapput, Nanortalimmi takornariaqarnermik pisortaq Niels Tækker oqaluttuarpoq.

- Umiarsuup aamma Nanortalimmut tikinnissaa takorusussimagaluarparput, Niels Tækker oqaluttuarpoq, allanngortinneqarsinnaanngippalli Aappilattoq kalaallit kultuiannik ileqquinillu takutitaqassappat ajunngilluinnarpoq.

MS Europap ilaasui 400 missaanniittut naatsorsuutigineqarput taakkua amerlanerit Tyskland, Østrig aamma Schweiz-imit aggerfeqarput. Umiarsuup Paamiunut, Nuummut, Ilulissanut aamma Qaqortumut tulannissaa naatsorsuutigineqarpoq, sapaatiuppat tulliani Reykjavikkimut ingerlaqqinnginnissani sioqqullugu.

Powered by Labrador CMS