Erngup nukinganik nukissiorfimmi isumaqatigiittoqarpoq

Nukissiorfiit Energikonsortiet Qorlortorsuarmi erngup nukianik nukissiorfik pillugu isumaqatigiissuteqarfigaa

Henrik Estrup Nukissiorfiit pisortaanera. Foto Leiff Josefsen

Saqqummiunneqarpoq juulip ulluisa 17-ianni 2012 Nukissiorfiit aamma Energikonsortiet Qorlortorsuarmi erngup nukianik nukissiorfimmi sanaartornermut atatillugu isumaqatigiissitsiniarnermi isumaqatigiissuteqartut.

Isumaqatigiissuteqarnerup kinguneraa Energikonsortiet I/S-ip Nukissiorfinnut piumasaqaatigisai tamakkerlutik aamma inaarutaasumik aalajangiiffigineqartut Nukissiorfiit 57 mio. koruuninik Energikonsortiet I/S-imut akiliineratigut. Taamatuttaaq isumaqatigiissuteqarnerup kinguneranik Energikonsortiet I/S pisussaaffilerpoq sanaartornermi kukkunerit aamma amigaataasut arlallit iluarsissallugit.

300 million koruunit
Nukissiorfiit 2003-imi Energikonsortiet I/S suliarisassat tamakkerlugit suliarinnittussatut Qorlortorsuarmi erngup nukianik nukissiorfimmik sanaartortussatut isumaqatigiissuteqarfigaa. Sanaartornerup naammassineqareernerata kingorna Energikonsortiet I/S Nukissiorfinnut piumasaqaateqarpoq 235 mio. koruuninik erniaat ilanngullugit aningaasat 300 mio. koruunit pallippaat.

- Piumasaqaatit matuma siuliani taaneqartut tunngavigalugit Nukissiorfinnit toqqarneqarpoq Energikonsortiet isumaqatigiissuteqarfigineqassasoq, tamatumani nalorninartut pinngitsoorniarlugit tassami isumaqatigiissitsiniaanerni taamatut ittoqartuaannarmat, nukissiornermut pisortaq Henrik Estrup oqaluttuarpoq.

- Isumaqatigiissuteqarnerup isumaqatigiissitsiniarnermi angusassat Nukissiorfinnut annertunerusumik naammaginannginnissaat pinngitsoortippaat, taamatuttaaq siunissami isumaqatigiissitsiniarnermi aningaasartuutissat inatsisilerituunit millioninit marlunnik kisitsisitaqartussatut nalilerneqartut sipaarneqassallutik.

Læs også "Stor uenighed skiller parterne"

Læs også "Ingen økonomisk bombe"

Isumaqatigiissuteqarnerup tamatuma kingorna suli ilua’tungaanut piumasaqaatinik peqarpoq, taakku Nukissiorfiit Energikonsortiet I/S-imut piumasaqaatigivai.

- Piumasaqaatit taakku maannakkut Voldgiftrettimi (isumaqatigiissitsiniarnermi eqqartuussivimmi) nalilersorneqarput, kiisalu illua’tungeriit isumaqatigiissutigaat tamatuma kingorna ilua’tungaanut piumasaqaatit taakku pillugit isumaqatigiissuteqartoqarnissaa misilinneqassasoq, Henrik Estrup nassuiaavoq.

Energikonsortiet I/S-imut ilaapput danskit suliffeqarfii entreprenørit E. Phil og Søn A/S aamma YIT A/S aammattaaq Islandimiut suliffeqarfii entreprenørit ISTAK Ltd. aamma Landsvirkjun.

Powered by Labrador CMS