Arsaannermi festivali Aasianni
Ukioq manna FIFA-p arsaannermi festivalii meeqqanut arsanik tujuuluaqqanillu sungiusaasunullu atisanik sungiusaatinik agguaassiviusut aallartiinnaleqaat
Sapaammi juulip 29-ani nal. 13.00-imiit 15.00-imut FIFA Football Festival Aasianni aaqqissuunneqassaaq. Taama ilisimatitsivoq Jens Tang Olesen nunatsinni arsaattartut kattuffiannit GBU-meersoq.
Festivali tamaani meeqqanut arfinilinniit aqqaneq-marlunnut ukiulinnut ammassaaq.
Arsaannermi festivalit siorna aallartipput.
Qaqortumi arsaannermi festivali pillugu matumani atuarsinnaavutit
2011-mi Nuummi arsaannermi festivali pillugu matumani atuarsinnaavutit
Matumanilu 2011-mi Ilulissani arsaannermi festivali siullersaasoq pillugu atuarsinnaavutit.
FIFA Football Festival sungiusaasut tallimanngornermi, arfininngornermi sapaammilu meeqqanut arsaannermik sammisaqartitsinerup qanoq pilersaarusiorneqarnissaanik, aaqqissuunneqarnissaanik ingerlanneqarnissaanillu ilitsersorneqarsimasut siulersortigalugit akunnerni marlunni arsaannermi sammisaqartitsineruvoq.
Sungiusaasunik makkunanngaanneersunik Aasiannut qaaqqusisoqarsimavoq: Qeqertarsuaq, Qasigiannguit, Kangaatsiaq aamma Aasiaat, kiisalu nunaqarfiit Akunnaaq, Kitsissuarsuit, Ikamiut, Kangerluk, Attu, Iginniarfik, Ikerasaarsuk aamma Niaqornaarsuk.
Sungiusaasut peqataasut kingusinnerusukkut najukkaminni GBU - Coca-Cola isikkamik arsaannermik ilinniarfinnik pilersaarusiorlutillu ingerlatsinissaat pilersaarutaasoq Jens Tang Olesen nassuiaavoq.
Sungiusaasunik soqutiginnittunik pikkorissaaneq tallimanngornermi juulip 27-ani nal. 13.00 Aasianni Timersortarfissuarmi aallartissaaq aqutsisoralugu FIFA/DBU-instruktør Troels Gaardbo, Danmark.
FIFA Football Festivalimut atatillugu meeqqanut arsaqarlunilu tujuuluaraqassaaq sungiusaasunullu sungiusaatinik atisaqassalluni.