Kiassuaq aporfiunngilaq
Rulleskini rulleskøjtinilu pisortatigoortuunngitsumik GM-ip immikkoortua kingulleq aasarissuarmi ingerlanneqarpoq
Isorartuumut sukkaniunneq rulleskini pisortatigoortuunngitsumik GM-imi unammissutigineqartut kingullersaraat.
Unamminerit pillugit annerusumik atuarit uani Seqinnarissuup ataani sukkaniuttut
Arnat 30 kilometerinik isorartussusilimmut unammipput, angutillu 40 kilometerinut unammillutik. Arnani peqataasoq ataasiinnaasoq angutini pissartanngorniuttut pingasuupput. tassaasut Øystein Slettemark, Karl-Peter Kristensen aamma Angutinnguaq Olsen.
- Taakkua pingasut 10 kilometerini siullerni ingerlaqatigiipput, Øystein sekundinik pingasunnguanik siulliusoq tullersortigalugu Karl-Peter, Angutinnguaq Olsenilu kingulliunerulaartoq. Aappassaanik kaajallaakkiartornerminni Øystein aamma Karl-Peter siuarneroqqipput, Ole Lynge Hansen aaqqissuisunit NUP-meersoq Sermitsiaq.AG-mut oqarpoq.
- Kiannera sukkaniuttunut sakkortoqaaq, tamannalu malunnaateqarluarpoq. Pingajussaanik kaajallaakkiartornermi Øystein Slettemark aamma Karl-Peter Kristensen suli naligeeqalutik unammipput. Øystein Karl-Peter Kristensenimit siulliulaartuarpoq, unammisartutoqarlu minutsinik pingasuinnarnik sukkanerulluni apuulluni. Øysteinip ingerlaarnermini atorsimavai 1.34,59 tiiimit. Karl-Peter Kristensenip 40 kilometerinut ingerlaarnermini atorsimavai 1.38,03 tiimit.
- Niviaq Chemnitz Berthelsen arnani kisiartaavoq, taamaakkaluartorli Niviaq angutinut aamma unammisinnaasarpoq. Kiassuup ataani ingerlalluarpoq, 30 kilometerinullu atorsimallugit 1.29,42 tiimit.
Aamma Martin Møller pillugu atuarit.
- 10 kilometerinut ingerlaarfimmi aallartiffimmi apuuffimmilu imertarfeqarpoq paarnanik nerisassartalimmik. Nunatsinni ujakkaartartut pikkorinnerpaartaasa ilaannik ulluni sisamani katersortitsisinnaasimaneq peqatigiiffimmut aaqqissuisuusumut Nuummo Ujakkaartartut Peqatigiiffiannut NUP-imut misigisaavoq nuannersoq. Timersoqatigiiffiup aningaasaliisut rulleskini rulleskøjtinilu pisortatigoortuunngitsumik GM-imut tapiissuteqarsimasut qutsavigiumavai. Taakkua tassaapput Unik, Nuuk Imeq, Butik Nathalie kiisalu Sermersooq Kommune, Ole Lynge Hansen oqarpoq.