Spejderit eqeersimaarput

Quassuttuut suli amigaataapput. Taakkua katiterneqarlutik nerrivinngorpata nerisassat innangarmit nerineqarunnaassapput. Taakkua saniatigut tammaarsimaarfik isaarialerneqassaaq. Kisianni ikumaartitsivik piulereerpoq, toqqit naparutaat nunamut ikkussuunneqareerput, tupeq peqqumaataasivik napparneqareerluni. Quassuttuunik utaqqinerup nalaani sapaatip ullaatungaa ivikkanut ingillutik meqqut, ujaloq puisillu amia atorlugit sammisaqartoqarpoq.

Nunarsuup ilarujussuanit spejderit katerittut 35.000 akornanni kalaallit inuusuttut 21't angalaqataasullu marluk Danmarkimi spejderit tammaarsimaarnerisa annersaanni narsaaterujussuarmi Sir'imi Holstebrop kitaatungaaniittumi peqataapput. Kalaallit Nunaannit tammaarsimaariat teqeqqut ungasinnersaanni inissinneqarsimapput Knostrup'imik taasami.

Tamaani sapaatip akunnera naallugu najugaqarlutillu sammisaqassapput. Tamaani misigisassarpassuaqassapput sapaammi unnukkut ammaanersiornermik aallartittumik qitinnermik, nipilersornermik nipituuliornermillu. Ilaatigut spejderit "qernertut" Anders Lund Madsen aamma Anders Breinholt ammaanersiornermi nalliuttorsiornermi oqaluttuussapput. Kisianni aamma Martin Brygmann kiisalu Det Kongelige Teaters Balletskole takutitsinerat isiginnaarneqarsinnaajumaarput.

Taamakkuli pisinnagit kusanartunik atisaqarnissaq pingaaruteqarpoq. Inuusuttut peqataasut tamarmik 2500 koruuninik tunineqarsimapput, kiisalu spejderit ilulliannik tungujortumik pisissutissamik tunineqarlutik, taamaattumik sapaammi ullup qeqqata siorna ilulliit spejderit ilisarnaataannik mersugassanik ikkussuiffigineqarput, kikkut tamat takusinnaaniassammassuk, spejderit tungujortut tassaasut Kalaallit Nunaanneersut. Taakkua saniatigut puisip amimernganik mersortunnguaqarpoq taakkua spejderinut allanut nunanit allaneersunut paarlaanniarneqartussaapput. Tammajuitsussat imaannaanngitsut.

Tassami tamanna pingaarnerpaajuvoq: nunat tamalaat akimorlugit inuunerup sinneranut ikinngutitaartornissaq.

- Suut tamaasa qilanaaraakka. Inunnik nutaanik naapitsissaanga, Avgo Henriksen 17'inik ukiulik oqarpoq.

Taassuma nuannaraa igaqatigiinnernut peqataasarnissaq.

- Maannakkorpiaq ajunngilanga kisianni soorlu tassa umiatsiarlunga. Angalanitta kingorna timera tamarmi soorlu suli aalasoq. Qaangiutissaaq. Sapaatip akunneranut nuannersumut piareersimavunga, Avgo oqarpoq.

Kalaallit spejderit Holstebromut arfininngornermi unnukkut tikipput, Kalaallit Nunaanni Spejderit siulittaasuat, Hans Kristian Lennert naapertorlugu inuusuttuaqqat inuunertik naallugu eqqaamasassaannik misigisaqartinnissaat anguniarneqassaaq:

- Taamak nuannertigisumik misigisaqarsimagaanni spejderiujuaannarnissaq anguneqartarpoq. Spejderiuneq sammisaavoq peqqinnartoq. Misigisassat nuannernerpaartaraat ikinngutitaartorneq, Hans Kristian Lennert oqarpoq, taassumalli neriorsuutigisinnaanngilaa spejderit Kalaallit Nunaannut juulip 29'anni uterunik ipiitsuunissaat.

- Sapaatip akunnera naallugu asattuinnartassagunarpugut. Taamaattumik angerlarunik uffarumaarput, illarluni oqarpoq.

Tammaarsimaarnermi sapaatip akunnera naallugu sammineqartussat uani atuarneqarsinnaapput, aamma Holstebromut qanittumiikkaanni tammaarsimaartut alakkarnissaannut tikilluaqqusaavutit.