WWF immap sikua nalunaarsulerpaa

Issittumi sikup annikillinera nanoqatigiinnut unammillernarpoq. Sapaatip akunnerani aggersumi WWF Kalaallit Nunaata Avannaani aasaanerani ilisimasassarsiussaaq

Juulip 24'at WWF Upernavimmit Qaanaaliarlutik aallassapput. Umiarsuaq Arctic Tern nunaqarfinni illooqarfinnilu tikitaminni meeqqanut sammisaqartitsissaaq. Assi: WWF

Verdensnaturfonden WWF, suliniut nutaaq aallarnerpaa taamaaliornikkut immaq sikuata annertussusaa paasiniarneqassaaq nalunaarsorneqarlunilu taanna tunngavigalugu siammasissusumik oqallinnissaq pilersinniarneqassaaq nunani issittuniittuni najugallit qanoq Issittumi pinngortitamik uumasunillu pitsaanerusumik illersuisinnaanersut.

Taamaattumik WWF'ip avannaa angalaarfigissavaa umiarsuarmik Arctic Tern taanna maanakkut Upernaviup eqqaani kisaqqqavoq. Students on Ice umiartortut pingasut ilaapput marlunngorneq juulip 24'at WWF'imi nunami sulisut sisamat umiarsuarmut ikissapput kingorna Qaanaap tungaanut angalassallutik, aqqutaani illoqarfiit nunaqarfiillu tikeraarneqartassallutik. Angalaqataasussat ilagaat biloginngorniaq Sascha Sciøtt, Qaqortoq.

Umiartornerup siunertaraa Issittumik isiginnaarneq oqaluttuarnerlu kiisalu sammisaqartitsinerit meeqqanut naleqqunnerusut. Umiartortussalli aalisartut piniartullu oqaloqatigerusuppaat silap pissusaata allanngorneranik malugisaat pillugit.

Issittumi immikkoortuani nanoqatigiit 19'iupput. Ilisimatuut uppernarsarpaat taakkunannga nanoqatigiit tallimat ikiliartortut, tallimat allat aalaakkaasuussut. Nanoqatigiit taamaallaat marluk siuariarnermik takussutissiipput. Ullumikkut paasissutissaatit ima ikitsigipput nanoqatigiit arfineq-marluk sinneruttut qanoq innersut ilisimaneqarnani. Kisianni ilisimaneqarpoq silap pissusaata allanngoriartornerata nassataanik nannut immami sikunit piniarsinnaanerat ajornarnerulersinneqartoq. Aamma ilisimaneqarpoq akornusersuisinnaasut nutaat nanoqatigiit ilaannik ilungersortitsissasut umiarsuarnut aqquserngit nutaat ammarnerannit aamma uuliamik aatsitassanillu ujaasinerit amerliartortillugit.

Powered by Labrador CMS