Ilaasoq: Ingasappallaaqaaq
23-nik ukiulik Jens Møller angallammut Eqip Sermianut qanillivallaartumut ilaasimavoq
Angallateeqqap, nammineq akkamilu takornarillu australiamiup ilaaffigisaat malerujussuarmit eqqornerata kingorna minutsialunnguit qaangiuttut aatsaat Jens Møllerip paasilerpaa pisimasoq qanoq ulorianartigisimasoq.
Taamaasilluni pingasunngornerup ualikkua ajortorujussuarnik kinguneqarsimasinnaagaluarpoq, angallammi inuttat Ilulissat avannaanni Eqip Sermiata eqqaanut uninnerisa kingorna iigartartoq iigarmat.
- Angallatip iluanut arpappunga sermimit qanngorpallannersuaq tusaagakku malerujussuarlu aggersoq takullugu. Annanniartariaqarpoq. Iluatsitsisorujussuuvugut maliinnaap eqqormatigut, sikuunngitsut. Angallammut sikuminiinnaat pipput, 23-nik ukiulik Jens Møller Sermitsiaq.AG-mut oqaluttuarpoq.
Video alla takuuk uani "Ajorluinnartumik kinguneqarsimasinnaagaluarpoq"
- Misigisaq sualuttorujussuuvoq, tassa 15 meterinik iigartartumut qaninnerusimasuugutta angallat kinngusimasinnaagaluarmat.
- Inuuninnik ulorianartorsiorlutit migisisimasimavit?
- Naamik, tamassuma pinerani eqqarsaatiginngilara. Siullerpaamik eqqarsaatigaara angallat malimmit sermimillu ajoqusersimappat iluarsaatissagipput. Inuunitsinnik ulorianartorsiorsimasinnaasugut aatsaat paasivara ulloq taanna kingusinnerusukkutr video-liara ilaquttannut takutikkakku. Angallatip malimmit eqqorneqarnerata kingorna minutsialunnguit qaangiuttut nissukka sajulerput. Ingasappallaarsimaqaaq, Jens Møller, Sisimiuni najugalik, Ilulissanulli feriarsimasoq, oqaluttuarpoq.