Video: Ajorluinnartumik pisoqarsimasinnaagaluarpoq
Eqip Sermia tassanngaannaq iigarmat umiatsiami inuttat tupatsinneqarput
Eqip Sermia Ilulissat avannaaniittoq tassanngaannaq iigalermat umiatsiaaqqami inuttat sermip saannguaniittut qujanartumik tuparujussuaannarput.
Sermip iigarnera malerujussuarmik umiatsiaaqqamut inuttaanullu kinguneqarnerlussimasinnaagaluartumik pilersitsivoq.
- Inuuninni misigisimasama manna pikkunarnersaraat. Toqu taama qanitsiginngisaannarsimavara, umiatsiaq malimmit eqqorneqaqqammersoq angut tuluttut oqaluttoq umiatsiamiittoq oqarpoq.
Videomi takuneqarsinnaavoq ingerlatitsisoq kalaallisut oqaluttoq. Sermitsiaq.AG-p taanna allalluunniit videoliaq sisamanngornermi nettimut nuunneqartoq maannalu nuannarineqartorujussuanngoreersoq pillugu annertunerusumik oqaluttuarsinnaasut attaveqarfigerusuttorujussuuai. Nittartakkami nutaarsiassalerisut attaveqarfigineqarsinnaapput redaktion@sermitsiaq.ag aamma telefonnummer 38 39 56 aqqutigalugit.