Dickowip videoliaanik Nina suliarinnittuuvoq
Nina Paninnguaq Skydsbjerg Jacobsenip pingaartumik nukkami aqqaneq-marlunnik ukiullip Tina Dickowip musikvideoliaani Nuummi immiunneqartumi pingaarnertut inuttaanera tulluusimaarutigaa
Ullut pingasut.
Tina Dickowip musikvideoliaata Nuummi juunimi immiunneqartup "filmiliarineqarnera" taama sivisussuseqarpoq.
Suliarinnittuuvoq Nina Paninnguaq Skydsbjerg Jacobsen.
Taassumali nukkani aqqaneq-marlunnik ukiulik Arnajaraq Poulsen videoliami nikallunganakujuttumi qanittukkullu nittartakkami maani takutitatsinni pingaarnertut inuttaasoq eqqartorusunneruaa.
Læs og se musikvideo i "Ny Tina Dickow-video foregår i Nuuk"
- Video naammagisimaartorujussuuara - pingaartumik nukaraq tulluusimaarutigisorujussuugakku. Tupinnaannartumik tunniusimassuseqarpoq. Aqqaneq-marlunnik ukiulinni takussaarpianngitsumik nunamut tunngavoq ataatsimullu isigalugu pikkorilluinnarluni, Nina Paninnguaq Skydsbjerg Jacobsen Sermitsiaq.AG-mut oqaluttuarpoq.
Nukaa piginnaaneqarluartoq
- Filmiliortussanit maajip qiteqqunnerani attaveqarfigineqarama oqarmatalu niviarsiaraq 13-it missaannik ukiulik atorfissaqartinneqassasoq, ingerlaannaq eqqarsarpunga taanna tassaassasoq nukara, Paarisa pillugu takutitassiami siusinnerusukkut suleqatigeriigara atorsimasaralu. Taanna pikkorilluinnartuuvoq suleqatikkuminartuullunillu. Malaatiinnarlugu takutitsisaqattaartarpoq isiginnaartitsinerminilu "minguitsorujussuulluni".
- Nalunngiliuk sooq musikvideo Nuummi immiunneqartussaasimanersoq?
- Nunatsinni alutornartumik pinngortitaqarnerput avaqqunneqarsinnaanngilaq, filmiliortunillu kissaatigineqarpoq malunnaataalluartussaq tassaasariaqartoq pissutsit imminnut akerleriissut nukillu pinngortitamit aasinnaasaavut. Videomi niviarsiaraq pinngortitamit asanninnermik nukinnillu aallersoq takutinneqarpoq, 26-nik ukiulik Nina Paninnguaq Skydsbjerg Jacobsen oqaluttuarpoq.
Musikvideo suliarineqarpoq erinnamut ”Moon To Let”-imut. Taalliortoq erinniortorlu nuannarineqarluartoq Tina Dickow videomi ilaatigut Nuummi eqqaavisuarmi, Qapiarfiusaami Tuapannguanilu immiunneqartumi peqataanngilaq.
Carpark Northikkutmusikvideoliaat
Video suliarineqarpoq Saunacigar Jacob Møller aamma Martin Skovbjerg suleqatigalugit.
Nina Paninnguaq Skydsbjerg Jacobsen 2011-mi Carpark Northikkut musikvideoliaannut "Everything Starts Again"-imut atatillugu line produceriuvoq. Tamanna aqqutigalugu Tina Dickowip musikvideoliaanik suliarinnittoorusunnersoq aperineqarpoq.
Musikvideo maani takuuk imaluunniit takoqqiguk.
Ninap nukaata Arnajaraq Poulsenip apersornissaa aaqqissuisoqarfimmit sulissutigineqarpoq