Tasiilami nukkassartoqassaaq

Ullumi pingasunngornermit Tasiilami innuttaasut tamarmik illoqarfimmi silami fitness-ertarfittaani nukkassarsinnaalerput.

Patrick M. Abrahamsenip politiinngorniarfimmi naammassigamili meeqqanut inuusuttunullu fitness-ertarfik pilersaarusiorsimavaa maannalu sanasimallugu.

Illoqarfiup qeqqa nuanniippallaarsimaqaaq
Isumaliutigineqarsimavoq illoqarfiup qeqqa, inuit ullut tamaasa aqqusaartagaat, meeqqanut, inuusuttunut inersimasunullu pilerinartunngorsarnissaa. Ruujorit eqqaavimmeersut kasiilerneqarsimasut fitnesscenterimut nutaamut allaanerusumut atorneqarsimapput, inuillu saneqquttut tassani aliikkusersorsinnaapput.

- Uanga nammineq sungiusartarfissannik amigaateqarsimavunga, taamaattumik pull-up bars-inik sananiarsimavunga crossfit-imik sungiusarfissannik. Sukasuumilli ineriartorpoq, tassanngaannarlu suliniut tapersersorneqartorujussuanngorpoq, Patrick M. Abrahamsen oqaluttuarpoq.

- Inissiiffiusinnaasut misissorpakka paasivaralu illoqarfiup qeqqa "kiserliulaartoq" ullut tamaasa aqqusaarneqartaraluarluni. Taava nunaminermik tunineqarnissamut assaanissamullu akuersissummik qinnuteqarpunga. Suliniutip ilusilersornera nuannersorujussuusimavoq, iluatsinngisaannarsimassagaluarporlu ikinngutinnit Jaaku Andreassenimit kiisalu ingerlatsivinnit, ingerlaannavik isumassarsiamut lastbiilinik assaassuarnillu, qalipaatinik svejserutinilu allarpassuarnillu ikiuuttunit, tapersersorneqartorujussuusimanngitsuuguma.

Akeqanngitsumik sananeqarnissaanik missingersuut malinneqarpoq

Patrick M. Abrahamsen oqaluttuarpoq suliniutip akeqanngitsuunissaa missingersuutaasimasoq, akeqanngivissumillumi sananeqarpoq.

- Sananerata nalaani inuusuttut meeqqallu amerlasuut takkussuuttalereerput maannalu atortut namminneq nassaarsiorlutik atorlualereerpaat.

Tasiilami fitness-eqarfiup silamiittup nutaap sananeqarneranit asserpassuit allat takukkit