Taamaattumik internettimut attaveerukkaluarputit
Tele-Post pingasunngornermi ualikkut internettimik aamma Iserfik-erhvervstelefonimik ajornartorsiuteqarpoq
Pingasunngornermi internettimut attaveqaat ajornartorsiutigisimagukku qarasaasiavit ajoquteqarsimanissaa ilimananngilaq.
Tele-Post Sermitsiaq.AG-mut ilumoorneraalluni oqarpoq, suliffeqarfiup ippassaq nal. 13.30 aamma 15.30 akornanni internet aamma Iserfik-erhvervstelefoni ajornartorsiutigisimagai.
Sullitat ataasiakkaat nal. 13.30-miit ajornartorsiummit kalluarneqalerput sullitallu tamarmik nal. 14.45-miit kalluarneqalerlutik.
- Pisut ullaaq manna nalilersorpavut, paasinarsivorlu ajoqummik ujaasineq iluarsiiniarnerlu pisunit arlalinnit ataatsikkut pisunit ajornakusuulersinneqartut: Nuussuarmi kabelimik attaveerunneq, radiokædemi ersigunnaartoqarluni Qaqortup Aasiaallu akornanni attaveqarnerup pitsaajunnaarneranik kinguneqartumik kiisa IP-nettimi pilersaarutaasumik suliaq sullitat internettiisa ajoraluartumik attaveerukkiartuaarnerannik kinguneqartoq, Tele-Postimi attaveqarnermut immikkoortortaqarfimmeersoq Inge S. Rasmussen oqaluttuarpoq.
Ippassaq ajoqutit suliffeqarfiup sullitaanut ajoqutaasimanerat Tele-Postip ajuusaarutigaa.